Opolisi yaNamibia oya indile aanyasha ya hulithe po okuhila ombiga ndjoka tayi ithanwa “Hubbly Bubbly” ndyoka tayi longithwa unene kaanyasha, noya talika ko ya nika oshiponga.

Minista gwiikwameni, egameno nomataaguluko gokoongamba Lucia Iipumbu opamwe nomupevikuluntu gwopolisi moshilongo Elias Mutota sho yali ya talele po oshitopolwa shaShana Olyomakaya oyali wo ya thiki pomahala gamwe ngoka haga lopotwa ha pu ningilwa iimbuluma omolwa iikolitha oshowo iingangangamitha.

Uusiku wOlyomakaya mboka, Iipumbu okwali a thiki pomahala gomanwino mpoka aanyasha oyendji yali ya gongala taya nu iikolitha omanga yamwe taya hili ohubbly.

“Omushi shi ngaa kutya shoka ta mu hili oshanika oshiponga? Otashi teya po omaundjolowele geni, nye aanona aashona natango,” teya kumagidha ngaaka.

Otashi kala nawa ngele ta mu hulitha po okuhila ohubbly oshoka oyanika oshiponga.

Iipumbu okwa fatulula kutya elalakano lyoku thika paanyasha esiku ndyoka okuya londondha nokuyalonga shoka shili mondjila.

“Ohashi kala hwepo ngele aantu taya pukululwa pambili omanga ya nyanyukwa yo ya vule okuyoolola shoka shili mondjila naashoka shaali mondjila,” ta popi ngaaka.

Mutota okwa ti okwa ndhindhilike kutya pomahala ogendji gomanwino ya e nde esiku ndyoka opena aanyasha taya hili ohubbly, ihe olundji ohayi kala ya gwendhwa iingangamithi.

“Aanyasha otaya longitha ethimbo lyawo nayi, onkene ota tu indile opo ya hulithepo okuyi hila oshoka oya nika oshiponga. Mboka ya longo oshinima shoka ihaye shi longitha, ihe aanamibia oyeshi kwatela komeho,” ta nyenyeta ngaaka.

Ta gwedha po kutya epangelo olyili metifa okuya po noveta yokuindika ohubbly yi longithwe moshilongo muka.

Mutota okwa ti oya hala ohubbly yi hulepo opo ya kale yena aanyasha yeli kondjila monikuyiwa, ohubbly otayi ya teya po.

vkaapanda@nepc.com.na