ONDANGWA – Minista gomayambulepo goondoolopa niitopolwa yokuushayi James Sankwasa, okwa kwashilipaleke kutya ota futu oondjo dhe dhomeya, ihe kehe gumwe oku na okufuta oongunga dhe dhomeya.

Sankwasa okwa popi ngaaka moshigongiilonga shi na sha nookansela yomalelondoolopa ga yooloka kOndangwa Omandaaha, ngoka taga hulu mEtitano.

Ndhoka okwe dhi popi sha landula oshinyangadhalwa sha li sha nyolwa koshifokundaneki shoThe Namibian oshiwike sha za ko, kutya Sankwasa oku na oondjo dhomeya dhoshimaliwa sha thika N$174 000, nonado ta pula omalelo goondolopa ga fute oongunga dhawo.

“Onda hala okuyelitha nawa kutya nonando ya shange omatotwahokololo ge thike peni, itandi hulitha po okupula omalelo ga fute oondjo dhawo. 

Oondjo dhomeya nadhi futwe, aaleli yoondolopa naya kwashilipaleke kutya omahangano omanene, uuministeli osho wo omandiki ge na ondjo naga fute oondjo dhawo,” ta thindi omuthindo ngaaka. Sankwasa okwa ti onkalo yokuteta ko omeya gaantu ye na ashike oondjo oonshona, omanga taya thigi ko mboka ye na oondjo odhindji, itayi pitikwa.

Ta ti, oto adha omukulupe e na ashike oondjo dhoN$500, ihe omeya ge otaga tetwa ko, omanga pe na omahangano omanene gena oondjo dhoN$500 000, ihe omeya itaga tetwa ko, shoka otashi ti ngiini.

“Longeni pawuyuuki, longeni shoka shi li mondjila, inamu dhimbwa omauvaneko mwa gandja moshigwana ongaaleli,” ta kumagidha ngaaaka.

Sankwasa okwa ti nkene Namwater a tamekele okuandjaneka omeya kuushayi, oopelesenda dhaantu 80, odh ina omeya ga tetwa ko oshoka oye na oondjo dhomeya.

Ta pula kutya oshi li ngaa mondjila, ngeno okwa li ya tula ko oomboola dhomeya, ngeno omeya oge na ombiliha kuushayi, shi vulithe sho ge na ondilo kuNamwater, sigo oshigwana sha patelwa omeya.

Moshigongi omo tuu moka, Sankwasa okwa li a gandja elombwelo kaakalelipo yongundu yo-AR, opo ya pite pondje ya ka hule ko uugala wongundu yawo.

“Shika kashi shi oshigongi shopapolitika, onkene itandi pitike aakalelipo mboka ya zala uugala wo-AR ya kuthe ombinga moshigongi muka omanga inaye hula ko,” ta popi ngaka.

Nonando ya li taya kondjitha okupewa omatompelo ga gwedhwa po, Sankwasa okwa popi kutya ina hala oonkundwa, ihe naya ningi shoka ta popi.

Oya li ya hula ko uugala, oshigongi tashi tsikile.

-vkaapanda@nepc.com.na