ONHUNO – Omupolifi Sergeant Dimbulukeveni Namhila weedula 44 ou vati a dipaa omushingi wololi okwa dja mo modolongo konima eshi e lifutila mo noN$2 000.

Okwa dja mo modolongo omudo wa dja ko muDesemba pefimbo a holoka momhangu yamengestalata waHangwena.

Oshibofa shaye osha undulilwa komafiku 28 Apiilili 2026, nomakonakono opolifi otaa twikile.

Komufala wopolifi koshitukulwa shaHangwena, Commissioner Ottilie Kashuupulwa okwa koleka onghundana ei kutya Namhila okwa dja mo modolongo paife.

Okwa yelifa ta ti Namhila okwa shuna koilonga paife ashike ina shuna ponhele opo kwa li ta longele nale. Namhila okwa kalelwa po kuhahende waye wopaumwene.

Namhila vati okwa yasha Eliud Hamukwa (39) ou a li omushingi wololi. Oshiningwanima osha ningwa omudo wa dja momwedi Mei keinda lopolifi kOnhuno moshitukulwa shaHangwena efimbo loufiku. 

Hamukwa okwa xulifila koshipundi shokomesho mololi konima eshi vati a umbwa eeholo lwoikando ya yooloka komupolifi tuu oo. 

Ovakwapata vaHamukwa otava nyenyeta tava ti moshibofa eshi inamu longifwa ouyuuki shaashi kashili mondjjila omunhu a dipaa ndele okwa dja mo diva modolongo. Meme waHamukwa, Loide Shilomboleni okwa ti ke na vali ombili yokomwenyo okudja ashike pefyo lomonamati waye ou a fya eshi vati a dipawa komupolifo.

“Onda tetwa meemhango lwoikando ya yooloka. Ohandi hepekwa komadilaadilo molwefyo lomonamati wange,” ta ti.

Okwa hokolola ta ti omona waye opo ashike a dipawa ndele omupolifi oo okwa dja mo nale modolongo.“Ame ongomudali kandi na vali ombili. 

Ohandi lili efimbo keshe. Ohandi dengwa koluhepo shaashi omumati wange oye kwa li ha kwafele nge. Wooo! Oluhepo vakwetu,” ta ti. Okwa pula kakukutu kopolifi Inspector General Joseph Shikongo osho yo omupangulidjai Martha Imalwa opo va kale va ya mo eenyala moshikumungu eshi.

“Omeva apyu ngeenge ino ma tilwa kolutu loye ku na efiku u ude oululume,” ta ti. 

Okwa ti ovapolifi otave liamene molwaashi omupolifi umwe ou kwa li ta yandje oumbangi komhangu okwa hokolola ta ti Namhila okwa umba ashike ondjebo komalola ololi.

Ova hokolola tava ti Hamukwa okwa dipawa ehe na eshi a ninga molwaashi okwa hangika ashike e li omutumba mololi. 

Okwa ti fiyo opapa ovakwapata vaNamhila inava ya ko keumbo lavo oku ka futa oikolo.

“Kashi li pauyuuki omunhu a dipaa ndele ota shuna moilonga,” ta ti. Shilomboleni okwa ti ngeenge natango Namhila okwa ka dipaa ndishi ota ka amwena natango kovapolifi vakwao.

Namhila okwa kala nokuholoka momhangu lwoikando ya yooloka.

Efimbo keshe ta holoka komhangu, ovakwapata vaHamukwa okwa li va ngudumana momwaalu muhapu komhangu yamengestalata yaHangwena va ninga omunyano wopambili tava pula opo Namhila aha pewe omhito yokulifutila mo modolongo ashike paife mboli okwa dja mo.

Ovakwapata ova pula epangelo opo omakonakono a ningwe pauyuuki pehe na ouyelele tau holekwa. 

“Inatu hafa molwaashi kape na ouyuuki moshibofa eshi. Namhila paife oku na eembangi dovapolifi vakwao tave mu popile,” umwe womumwainakadona ta ti.

Oshiwana ohashi di kombinga yaShikango osha hokolola kutya ohashi mono oixuna yokudengwa kovapolifi.

Umwe okwa ti ovapolifi paife ove lininga tava longele ovanhu ominyonena osho shi li shapuka.

Pefimbo a kala modolongo, Namhila okwa kala iha mono odjabi yaye molwaashi iha i vali koilonga.