Elenga lakula loshitunda shUukwambi Herman Ndilimani Iipumbu okwa ti ita popile ovanyasha tave lioteke. 

Iipumbu edi okwe di popya pefimbo ali ta yandje oshipopiwa shaye keyeululo loipindi yopamufyuululwakalo yoshiputudilo shaUNAM mOshakati. 

“Fyee nghee twa kala mOshiwambo omulumenhu nomukainhu iha va kala pamwe momukalo wopaihole ve li idilila. Ove na oku li hombola tete opo va kale ve li kalela momukalo ou,” Iipumbu ta ti. 

Ekalopamwe vati momukalo woku li oteka olo ta li eta omadipaafano shaashi vati ohali kwa tele mo oinima ihapu, ngaashi oku lipa oimaliwa eenduba, noku li landela oinina yondilo. Konima eshi tashi kakala shi he li uditafane va li ovanhu vati oha ve li dipaya ashike. Okwa ti ovanhu vonena ova kupulashi omufyuululwakalo neenghono yoo noinima ihapu paife oya shundulwa . 

“Ngeenge nee owa tale komadina ounona paife ove li ninga ashike oNamtex ponhele omunhu aifanwe Namutenya ngaashi alukwa noo Nangula ponhele omunhu aifanwe Nangux,” Iipumbu ta ti. 

Elenga ola pandula eshi oiputudilo taifi oshisho shoku kaleka po omifyuuluwakalo natango, opo ovanafikola va ha dimbwe. Okwa ti omukalo woludi eli otau eta ekwatafano liwa pokati komihoko dayooloka. 

Omauliko opaipindi aUNAM ohaa ningwa keshe odula, novanafikola hava mono omhito yo ku ulikafana omifyuululwakalo davo da yooloka. Natango omhito ei ohai kala ya yeulukila ovanafikola ava vena eengeshefa davo vadule oku landifa voo ve li monene po sha shomondjato. 

Oipindi ei otai ningwa koiputudilo aishe yaUNAM moshilongo noyateelelika ikale yapwa mOlomakaya. 

–taimihaihambo2000@gmail.com