Epangelo lyaNamibia olya gandja ehala kaanona yaAngola kOndangwa kosenda yewawa lyaanyasha, mboka ya ningi oomvula dha thika pundatu taya shingi nomapandaanda moshilongo ashihe.

Uuministeli wiikwameni netonatelo lyokoongamba owa pititha omushangwa kutya aanona ye li 200 oya tembudhwa nale okuza koWindhoek oshowo kiitopolwa yilwe yokonooli, nuuministeli otau tsikile okugongela aanona mboka ye li koondoolopa dhimwe moshilongo.

“Omanga tatu tsikile okugongaleka aanona mboka, otatu kala nokuyayambidhidha naashoka taya pumbwa omanga ye li mehala moka twe ya pa,’’ ombapila ya lesha ngaaka. 

Omukuluntuwiliki muuministeli wiikwameni netonatelo lyokoongamba Etienne Maritz okwa popi kutya aanona mboka oya kala ya taalela onkalo ondhigu, taya landitha omaluko, uukopi iiyaha noondhopi momapandaanda opo ya vule okumona sha shokulya.

‘’Omolwonkalo ondhigu ndjoka ya kala ya taalela, epangelo olye ya po nedhilandhilo lyoku ya gongela pehala limwe opo ya vule okuyambidhidhwa yo ya ye mekwatathano naavali yawo,’’ ta ti ngaaka.

Okwa popi kutya nonando ya kambadhala okupula aanona mboka omauyelele kutya owa zi peni oshowo mpoka pe na aakwenezimo yawo, owundji owa tindi okupopya.

Petameko

Uunona wUuangola womimvo dhi li pevi lela, okuza pomimvo ntano okuya pombanda, owa kala wa taalela onkalo ondhigu, sho tau ende tau li momandoloma oshowo tau ende tau indile iikulya momapandaanda miitopolwa ayihe moshilongo, omanga yamwe taya lala momahala itaaga hokitha.

Oshifokundaneki shika omwedhi gwa zi ko, osha tsakaneke aanona yaAngola yomimvo tadhi tengenekwa okuza puntano okuya pokati, taya tondokele oohauto tadhi kankama kooha nopate mOshakati, tau landitha iinima wa humbata, wo tau indile oshimaliwa shokulanda sha shokulya.

Omumvo gwa zi ko natango okanona kamwe kOkaangola oka li ka lyatwa kohauto mOshakati, lwopOkatana Service, sho kwa li taka taagaluka opate omanga ta ka kongo uuhupilo. Elago enene oka hupu noka li ka ka mona uuhaku meendelelo.

Ayihe mbyoka oya holoka omolwonkalo ya taalela aanona mboka, okuza koshilongo shawo omolwonkalo ndjoka ya nyayika, yondjala ye ya tidha ko.

Uuministeli wokakwashikekookantu, owa kala nokuyamukula iikundanaki kutya owu na ontseyo kombinga yonkalo yaanona mboka ye li mehalakano moondoolopa dha yooloka.

“Uuministeli owu li metifa okukonakona nkene wu na okulonga nomandiki galwe miitopolwa moka, opo uupyakadhi mboka wa taalela aanona mboka wu kandulwe po,” omupevikuluntu muuministeli wokakwashikekookantu Martha Mbombo, okwa li a kuthile ko oshifokundaneki shika ombahu nokawawa.

Ta ti, poonkatu dhimwe ngaashi dhoka dhokutulwa moosikola, pakotampango lyaNamibia, aanona mboka oye na okukala ye na oonzapo dhomavalo, ndhoka kaaye na, naamboka uupyakadhi wa gwedhwa ko.

“Omapangelo gaali gaAngola naNamibia oga kala nokulongela kumwe omanga oshilongo inaashi manguluka, no aga tsikile okulongela kumwe okusila oshimpwiyu aantu yawo,’’ ta ti ngaaka.

Nao Jonzee omukiintu gOmuangola ngoka a adhika ta landitha iiyaha ye pOmatala gaShakati, sho a li a pulwa a tye ko sha kehokololo huka okwa ti onkundana yaanona ya gongelwa pehala limwe otayi mwenyeke, oshoka aanona yawo oya li mehalakano omolwondjala.

“Osha kala hashi tu uvitha nayi ongaavali ashike katu na nkene oshoka okwa li haya mono po sha shokulya. Otwa kala hatu longitha aanona ya ka indile “ondola” oshoka Aanamibia oye na ohenda naanona shi vulithe tse aakuluntu,’’ ta fatulula ngaaka.

Ta gwedha po ta ti, okuuvite wo nawa oshoka aanona yawo paife oye li megameno.

-vkaapanda@nepc.com.na