Charles Ndeumane
ONGWEDIVA – Momasiku 17 May 2024, elelo lyondoolopa yaNgwediva olya patulula pambelelwa oopoloyeka ndatu dhi na sha nomayakulo goshigwana oshowo ehumokomeho mondoolopa. Oopoloyeka ndhika ongaashi egwedhelo lyopate ndjoka yi li pokati kOshana Mall noDavid Shikomba Business Park oku dhi ninga mbali, omalamba omape ga tulwa mopate oyo tuu ndjoka, oshowo omalamba omape ga tulwa mopate onene yOngwediva. Epatululo pambelewa ndika olya ningwa ku mayola gwondoolopa yaNgwediva, Taraah Shalyefu, pamwe naanambelewa aanene melelo lyondoolopa, oshowo aahiwa mboka ya li ya holoka.
Ongwediva oya tseyika nawa onga yimwe yomoondolopa ndhoka tadhi koko tadhi endelele moshilongo, naashika osha kolekwa kepatululo pambelewa lyiilongadhalwa yelelo lyondoolopa mbyoka itatu. Mayola Taarah Shalyefu okwa holola etumba lye melelo lyondoolopa molwaeitulemo lyayo mehumokomeho lyondoolopa yaNgwediva sho a li ta popi pepatululo pambelewa lyopate ndjoka ya longwa. “Etumba enene okupatulula pambelewa opate ndjika, otwa katuka onkantu okuya komeho ongondoolopa”, osho mayola a thamuna ngaaka.
Pauyelele wa gandjwa kumayola pethimbo lyoshipopiwa she, egwedhelo lyopate ndjoka yi li pokati kOshana Mall noDavid Shikomba Business Park oku dhi ninga mbali olya kotha elelo lyondoopa oomiliona N$4.1, oolamba dha tulwa mopate ndjoka odha kotha oomiliona N$2.1, omanga oolamba ndhoka dha tulwa mepandaanda lyOngwe dha kotha elelo omiliona N$1.1. “Aaklimo yomomudhingoloko gwOngwe Road oya kala nokukema molwonkalo yondhima moshitoplwa, unene tuu aanasikola, naashika osho sha eta elelo lyondoolopa lyi tule omalamba omape mondjila ndjoka”, osho Shalyefu a tsikile ko.
Omunangeshefa omunene mOngwediva Ben Zaaruka, a tseyika nawa nedhina Benz, gumwe gwomaanenentu ya li ye ya kepatululo ndika. Moshipopiwa she, Benz okwa popi kutya monakuziwa opate ndjoka okwa li hayi kala yu udha omusholondondo gwiihauto oshoka oya li onshona, iihauto oya li hayi piti po tayi ende kashona lela, ashike paife shoka oshi li monakuziwa. Okwa pandula elelo lyondoopa yaNgwediva molweitulemo lyayo mokuhumitha ondoolopa komeho nokuhwepopeka onkalo yaakalimo. Benz okwa tsikile ko ta ti Ongwediva oyo yimwe yomoondoolopa ndhoka t dhi koko tadhi endelele moshilongo.
-mrndeumaneraycharles@gmail.com