Ehangano lyoNamWater otali kumagindha oshigwana miitopolwa iitatu yokonooli, Oshana, Oshikoto nOhangwena opo shi kwate nawa omeya oshiwike sha taalelwa oshoka omeya otaga kala ga pata sho taga longwa oshiwike ashihe.

Omukuluntuwiliki mehangano lyoNamWater konooli Hieronymus Goraseb okwa pititha omushangwa kutya ondama yomeya mOshakati ndjoka hayi andjaneke omeya miitopolwa mbyoka otayi ka longwa okuza momasiku 27 sigo 31 omwendhi nguka.

“Omeya miitopolwa Oshana, Oshikoto nOhangwena otaga kala haga uhala ga pata. Otatu kala tatu ga patulula ashike uusiku okuza 22h00 sigo 05h00,” ta yelitha ngaaka.

Ta ti, omeya otaga hulu okulongwa mEtitano lyoshiwike sha taalelwa potundi 17h00.

Goraseb ota indile oshigwana shi longithe omeya nawa oshowo okupungula omeya nawa gaa pwe po yo ya kale ye li mompumbwe onene.

‘’Omahala ngaashi iipangelo, oosikola osho wo omahala ngoka itaga vulu okukala gaa na omeya omolwiinakugwanithwa yi na ongushu naya dhenge koonomola ndhika. Oshitopolwa shOhangwena 081 139 9483, Oshana 081 124 5567 omanga kOshikoto ya dhenge konomola 081 145 5267,” ta ti ngaaka.

-vkaapanda@nepc.com.na