ONGWEDIVA - Aavali oyendji moonoli oy eli ompinge netsikilo lyosikola konima yomasiku 28, hoka kwa tengenekwa andola aanasikola yoondoondo yoPre-Primary sigo ondondo onti-9 ya ka shune komanongelo. 
Oyendji oya kwatwa kuumbanda omolwa omukithi gwa monika maalongwa, maalongi nenge maavali koosikola dhimwe monooli.
Omuvali gumwe gomOshakati Maria Nathanael okwa ti, omukithi ngoka ogwa nika oshiponga oshoka ohagu taandele mbala, onkene ngele ogwa ponekele moosikola otashi ka kala oshidhigu okugu kondolola.

“Aanona aadhigu okulonga nayo, oshihwepo ngele osikola tayi  pata ashike lumwe. omvula ayihe oshoka omkithi ngoka ogwa taandela nale moshigwana. Ngele aanona oya tsikile osikola, kapena  ompito yo kugu keelela, ihe pamukalo ngoka  otagu taandelekwa,”Nathanael  ta ti ngaaka. Kamati Shilongo okwati, oku wete shili mondjila oondondo dho popanda dhi tsikile okuya komeho nelongo ooshoka mboka aakuluntu, no taya vulu okwiisila oshimpwiyu, shampa ashike taya pewa omalongo geli mondjila okukeelela omukithi ngoka.
“Aalongwa yondoondo 10,11 oshowo 12 otaya vulu okwiisila oshimpwiyu. Ashike okuza pondondo ontimugoyi oshowo sigo opevi natango inaya uvako uupyakadhi nuunene  womukithi nguka, onkene itaya ka gwanithapo omalombwelo nomalandulathano agehe ga tulwapo okukeelela omukithi gu taandele.

Omuvali gumwe ngoka inaa tumbula edhina lyekuKundana naye otatsu kumwe netompelo dhoosikola dhi pate, ta ti, omvula oyili nale pokupwako aanona inaaya mona elongo lya ihwapo. Oshihwepo  ya tegelele omvula ta yiya, lyo epangelo tali tokola ngele otaya endulula oongundu nenge otaya undulilwa komeho.

Nonande oyendji oyeli ompinge noosikola tadhi patuluke konima yomasiku 28, aavali yamwe otaya tsukumwe nasho.
Nathanel  Negonga popi ta ti, omukithi ngoka oguli nale moshigwana, naashoka shili mondjila okugu keelela nomilandu dhili mondjila. 
“Nonando aanona ya kala yeli momagumbo natango otaya vulu okugu etelwa kaakuluntu yawo, una yazi kiilonga. Omukithi ngoka kaguna mpoka tagu enukilwa ihe shoka shili mondjila oku iyutha ashike koompango nokomalombwelo ga tulwapo,” Negonga ta ti ngaaka.
Omupopiliko gwelongo Absalom Absalom okwati, nonando oosikola dhwe odhapata,  inashi yuka oosikola dhi patwe omolwa iipotha ya monika posikola yontumba, ihe shili mondjia okupata ashike oombinga dhoka dha  thikwa komufekelwa. “Omahala otaga pombelwa ashike, aalongwa taya tsikle okulongwa. Oondondo dhoka tadhi ka patwa omolwa gumwe amokithi ngoka omasiku ota gaka shonopekwa okuza komasiku 14,” Absalom a popi ngaaka.