Auleria Wakudumo
Ngoloneya woshitukulwa shaShana Elia Irimari okwa kunghilila ovakwashiwana opo vaha yule eeshi neenete deemwe odo va pewa kepangelo ile ve di landife po.
Irimari okwa kunghilila ovakwashiwana pefimbo a yandja eenete di li 700 koihakanwa yefundja oyo i li posenda pEhenye mOshakati Olomakaya.
“Onda hala mwa kwata nawa eenete edi opo mu liamene keemwe nokoipuka imwe, muha kwate komukifi woMalaria nadikwao da wedwa po okupitila moipuka,” Irimari ta ti.
Irimari okwa ti epangelo ohali yandje oikulya ya wana po keshe omwedi kovakwashiwana peesenda onghene ina hala okuuda ovanhu tava landifa eenete molwondjala.
Ngoloneya okwa holola kutya ovakwashiwana ova li va pewa nale eenete deemwe di li 65 omafiku a dja ko, ashike kada li da wanena.
“Eshi twa li posenda apa nomupresidente Netumbo Nandi-Ndaitwah, ovakwashiwana ova li va holola omakemo avo, nalimwe lomomakemo ola li kutya vahapu kave na eenete deemwe. Sho osho sha kufa nge momutumba ndi ka pule omakwafo penya naapenya opo ovakwashiwana va mone eenete,” Irimari ta ti.
Eenete vati oda yandjwa koohandimwe ovo ve liyamba okukwafela ovakwashiwana ovo va yelulwa molwomeva moshitukulwa.
“Onghuwo yeni oya udika kuvahapu. Oupyakadi oo mwa taalela owopokafimbo ashike itau kalelele,” Irimari ta ti.
Irimari okwa kumaida ovakwashiwana peetenda opo va kale ve na omukumo kutya omakwafo makwao otaa shikula ko.
Irimari okwa holola yo kutya ombelewa yaye onghene tai twikile okukonga omakwafo opo va kwafele okuyandja eenete deemwe kwaavo yo ve li momhumbwe momikunda.
Osenda Ehenye Relocation oyi na ovakwashiwana ve li 1 377 va dja komaumbo e li 398.
Pefimbo losheendo shomupresidente posenda, ovakwashiwana okwal i va holola kutya ove na omhumbwe yeenete o1 000.
Irimari okwa indila ovakwashiwana opo va kale omesho avo vene, okulopota ovo tava kwatifa eenete eeshi oshoy o ovo tave di landifa po.