Mape zuvakwa ayo ombongarero ozondekurona zOvakwena, Ovaherero nOvambanderu mOtjauana ndji za zeri ku no komiti yohoromende ya Namibia motjihungiriro tjOtjiṱiro Otjindjandja ya yarurwa ombunda oure woruveze ndu hi nokutjiukwa.

Omazuvira nga kaye nohongonono yokomiti oini tjinga Tonata Itenge-Emvula, Omuhaamise wOvihavero vyokomiti yozondjiwe aa undu otjiunda tje    nokumwina kumwi notjiruru tji tja mbii. Oku zirira kutja tjii hapo otjotjiri ozondekurona zOvakwena, Ovaherero nOvambanderu, ovakwatera va Tjauana nu mbe ri wina ovakwatera va Namibia mba zirire mOnamibia nave kakwaterwa kehi ndo indu ovanene vawo tji va huka ominyo vyondjembo ya Katjivitjouanga, varaisire onḓero yo ku hakayena naye.  Nandarire kutja pe novikaṋena vyokutja Itenge-Emvula eningira ronḓero yozondekurona inḓa oku hakayenena naye mEpako Oroviungura indi we yemwine. Mbiri kokutja  otja kondaze omutjange nḓa mwine oro rari epu ehungirirwa mokomiti ndji. Tjinene mokutja omutjange ingwi ondaze yokutja pe nonḓero neningira indi we yi isire pi? Naa ngahino eningira indi poo omahakayeneno inga otja kokomiti indji ya sere ku rira otjiundikwa pokati kayo nozondekurona za Tjauana. 

Nongendo okomiti indji pu ya utire okupaha ongahururiro kozondekurona kutja tjii hapo omutjange ingwi wa hindwa i yo? Na ihara  ourizemburuka wokutja ngahino omutjange ingwi ma kuramenepo ozondekurona , kutja ourizemburuka mbua putuka puye tjinga morutuu ku Emvula omutjange aari omukahuke kutja wa tjanga motjiṱo otje omuini otjomuwonge wozombuze omurikuramene. 

Ngunda ngamba omutjange ngwi ma undju omayauziro ku Itenge-Emvula ohunga nombongarero indji. Po siya okomiti ngunda ombango nambano mape munika ayo ya yandja nu yarire ongendo kuyo kutja ongahuriro ndji mai zerwa i yozondekurona za Tjauana aya ngunda ya tuwa meṋe tji tjarire ohepero ayeri okutjiwa kutja omutjange ngwi ondaze ndji wa isire pi. 

Omutjange ngwi wina wa vangere okuzuva mu Itenge-Emvula kutja ma tja vi komahakayeneno nozondekurona za Tjauana. Owo otja konḓero yazo nga sere okurira Oroviungura ndi mEpako. Nandarire porwe kokutja orutuu ndwa hindire ku Itenge- Emvula rwa vazere ma mu tarewa nyee nduu. 

Ngunda ape ri nao omambo womombepo na kotutavi twomiti maye zuvaka ayo rutenga okomiti ondji ma yii kOtjauana.