Lüderitz – Jennifer Shikongo omulongwa mondodo 7 poDiaz Primary School mo Lüderitz oye a pewa epapa lomulihongi dingi, eshi e shi pondola okulihonga nawa okuhovela mondodo 4 ndele fiyo ondodo 7.
Meitavelo Laban, omulongwa mondodo 3 pofikola opo tuu opo poDiaz oye a pewa epapa eshi e lihonga nawa okudja mondodo yotete ndele fiyo ondodo 3 poPrima fikola poDiaz.
Omapapa okwa yandjwa mehuliloshivike la ya mosaala yaDiaz Primary School, omo ovalongwa, ovalongi novadali va li va ongala nokutala nghene ovalongwa ovo va kala nokulihonga noudiinini tava pewa omapapa moilongwa ya yooloka, oshoyo moinyangadalwa aishe i na sha nehongo, mwa kwatelwa ovo ve shi endifa nawa momaudano, momafiyafano opaunhongononi, noshoyo ovanafikola ovo va kufa ombinga mongudulwiimbo yofikola nosho tuu.
Moudano woNetball epapa ola pewa Zinzi Humbilemo, mokatanga kokeemhadi epapa ola pewa Fanuel Johannes naAbraham Alweendo, moudano woRugby epapa ola pewa Fanuel Johannes.
Omapapa okwa yandjwa komutalelifikola woshikandjohongo shaNamib Casius Shanyengange naMayor waLüderitz Hilaria Mukapuli.
Moshipopiwa shaMayor okwa twa omukumo ovanafikola ve lihonge va mana mo, va kele ve na omafaneko neendjodi daasho va hala va ka kale monakwiiwa.
Ta denge omufindo opo kutya oshi li sha fimana omulongwa a kale e na omafaneko aasho a hala okukahanga monghalamweyo.
Mukapuli okwa kumaida ovanafikola ve litulemo, vaha fye ounye, opo vadule eendjodi davo dininge doshili.