Auleria Wakudumo

Omupopiliko wouministeli womidingonoko, eefuka nomapashiono Ndeshipanda Hamunyela okwa holola kutya ouministeli owa ninga etokolo lokudipaa ondjaba opo u amene oshiwana nomaliko asho. 

Hamunyela okwa ti ondjaba oya dipaelwa momukunda Onawa moshitukulwa shaMusati Olomakaya a dja ko eshi onghendabala yoku i alulila koshikunino shoinamwenyo kEtosha ya xulila mounyengwi. 

Ouministeli owa yelifa yo kutya ondjaba oyo oya monika momikunda da yooloka omanga inai ka dipawa mOnawa. Ouministeli owa holola kutya osha fimana okukwashilipalekela oshiwana molwaashi vamwe otava tandaveleke ouyelele woipupulu kutya mokati kavo omwa holoka eendjaba dihapu. 

Ondjaba oya pashukilwa omesho tete momudingonoko waOtjivarunda, sha landula eshi ya tauka mEtosha molwa epeya olo la li mo. Epeya eli vati ola fininika oinamwenyo i ka konge omeva yoo ika nyange kokule, osho tashi eta imwe i holoke mokati kovanhu ngaashi ondjaba ei. 

“Ovanambelewa vetu ova kala veli ondjaba ei mokashoko nova ninga eenghendabala dihapu okuishuna kEtosha omanga inai fika mokati koshiwana ashike eenghendabala adishe oda xulila mounyengwi,” Hamunyela ta holola ngaho. 

Hamunyela okwa holola yo kutya ondjaba oya enda okudja ondjila yaOtjivarundu fiyo Onkani ndele tai twikile ya uka kOnaanka, Onaanda fiyo osheshi ya dipawa mOnawa. 

“Ondjaba ei ya monika kovakwashiwana momidingonoko da yooloka imwe ashike. Ondjaba oya monika yo pefimbo inali faafana, vamwe ovei mona efiku limwe navakwao efiku la shikula ko,” Hamunyela ta kwashilipaleke ngaho.

Etitano, ondjaba oya enda nale oshinano shile, noya tauluka eepate da kula ngaashi: opate yaShakati naKahao nopate yaShakati nOutapi noya hanauna nale omaliko oshiwana amwe mondjila yayo. 

Hamunyela okwa ti eshi ya ka enda ya uka popepi novanhu, ouminsteli owa ninga etokolo lokuidipaa shaashi oya eta oumbada mokati koshiwana. 

Ovakwashiwana vamwe ova holola kutya ka kwali hava tula omofi meisho shaashi va tila omaliko avo ile voo vene va monifwe oshiponga kondjaba. Vamwe ova ti ovali va tila molwa ounona vavo ovo hava i kofikola eengula dinene tava tauluka eengoya oshoyo oinamwenyo koshana ngeenge tai nyange. 

“Etokolo lokudipaa ondjaba kalali lipu shaashi alushe ohatu lalakanene okuamena ovanhu oshoyo oifitukuti yetu ashike moshiningwanima eshi ovanhu ovo vali unene va taalelwa koupyakadi ou, onghene otuna okuva amena,” Hamunyela ta kwashilipaleke natango. 

Ouministeli otau twikile okuninga omapekapeko kombinga yoinamwenyo oyo ya tauka mEtosha molwa epeya notau indile oshiwana opo shi lopote meendelelo oshifitukuti tashi ka holoka mokati kavo. 

Ovakwashiwana ova indilwa opo vaha taataye oifitukuti ile vei ongalele ndele nava lopote meendelelo kombelewa yomidingonoko ili popepi navo. 

-wakudumoauleria@gmail.com