KALIMBEZA – Muokameli wapurojekiti ya Mupunga wa Kalimbeza, Patrick Kompeli, ubulela kuli simu ikone kueza hande, itokwa kupompelwa masheleñi amañata akulekisa lisebeliso. Nabulezi zeo viki yefelile Lamubulo Mueteleli wanaha Nangolo Mbumba hane ailo potela purojekiri. Mbumba nakile azibahaza kanako yakutabela lizazi la tukuluho kuli mubuso ukafa purojekiti masheleñi alikana bolule balobapeli. Kono Kompeli nabulelezi Mbumba kuli masheleñi ane afilwe asa inzi kwa likolo la njimo, kakuli basa bata kutatulula zelyangani kwa simu.

Purojekiti haina hande minshini ni lisebeliso za kulimisa mupunga zecwale ka matirakita akuzamaya niona, zakucalisa mupunga, lisipi zaku ezisa mindandwe mwakucala, zakupwacisa mubu ni munshini omunca obakanya mupunga,” nekubilaezi Kompeli. Mbumba, yana kulisize mwa masimu mokucezwi mupunga, naize “selutokwa ki mupunga wakuca.” Purojekiti yebonahala kucuñuta inani feela ni matirakita amane abeleka. Kompeli naize nebafumani munshini omunca wakukutulisa mupunga. Simu ina ni limotikala zepeli, mi yeñwi yazona isali kushwa lilimo zepeli zefelile. Naize niha batalimana ni butata, nebacezi mupunga wamufuta wa Irga famubu walihekele zemashumi amalalu kazetalu, ili mupunga omukuswani. Balela kucala lihekele zemashumi akaetalizoho mupunga wamufuta wa Angola, Supa ni Irga unumwaha. Simu kaufela ilikana lihekele ze 229, mubu walihekele zelikana 150 kona onunile mokukonwa kucalwa, mi olikana lihekele ze 79 hauna mununo.

Zeñwi zeswanela kulukiswa kipatisiso yamayemo asimu, patisiso ya mubu, maswaniso asimu, ni talimelo ya zena niku eziwa mwa simu. Zeñwi kibona kuli mezi asuluhela kai, kulikaniseleza mubu mwa simu, kuyaha mikwakwa ni kuyandulula siteshini sa kupompela, kutusa mwanako ya muunda. Purojekiti ya mupunga, ye lelwa kuba yetuna mwanaha, kuli ituse kufukuza tala, mwa lilimo zefelile haisika tahisa kutulo yende.