KATIMA MULILO – Nyandi Mueteleli wapili wanaha Namibia Sam Nujoma nesi feela muuna walipolitiki – neli mueteleli yanana ni pono yana lumela kuli kuna ni maata mwa njimo akona kutisa cinceho mwa bupilo bwa bayahi banaha Namibia. Tiisezo yahae mwakubona kuli kuna ni lico mwa naha nikuli batu baipeleka nebonahala mwa milao yana nyatezi ni mapurojekiti ane afunguzi. Yeñwi ya mapurojekiti awo ki purojekiti ya Mupunga wa Kalimbeza mwa sikiliti sa Zambezi, teñi Nujoma nabile ni kabelo mwakucala mupunga mwa silimo sa 2008 ni 2010.

“Ndataluna wapili nabeile njimo kwa pilu yahae. Nabata kubona bayahi banaha Namibia basa lobali ni tala. Kalibaka leo, nakashize tahiso ya masimu. Mulelo wahae neli kubona naha Namibia kuba yeñwi yalinaha zelima hahulu mupunga mwa Afilika,” nekubulezi muzamaisi wa purojekiti ya mupunga kwa Kalimbeza Patrick Kompeli.

Takazo yeo ya njimo nesi feela pulelo yalipolitiki – neli mulelo Nujoma nabonisize mwa likezo. Mazoho ahae kakuba ni kabelo mwa mapurojekiti aswanasina Kalimbeza asupeza tumelo yahae yakuli Namibia nekona kuba naha mokusina tala.

Kompeli ulumela kuli mutala wasiile Nujoma mwa njimo neli wakutundamena, wa pono ni kuciseho. Kuekeza, Nujoma na utwisisa kuli kutiya kwa naha kutomile mwakuifepa. “Haluhupula Dr. Sam Nujoma, halulumbi feela zana bapalile kakulutahiseza tukuluho, kono tiisezo ya hae kwa mubu, nikuli batu ba ulime. Mulelo wahae wakutahisa lico uzwelapili, kuba mutala kwa balimi, bapangi bamulao, ni bao babalwanela kutahisa mulelo wahae kuli upetahale,” nabulezi hape.