Bakeñisa kuekezeha ni kuhula kwanombolo ya baoki mwa likolo za lituto zepahami mwanaha Namibia, katengo kakabona za babeleki bamakete banaha Namibia ili kakazibahala ka HPCN kaiketezi kufukuza nombolo yabaituti ba zabuoki. Mwaliñolo la taelo lene lifilwe cwalecwale, lene li amuhezwi kamaikuto ashelashelana, katengo ka HPCN nekaize nombolo ya baituti ba baoki ifitelezi nombolo likolo lilumelezwi kuamuhela.”

“Kalulo yeo ifofaza mayemo alituto zefiwa kwa baoki mwanaha Namibia, nikulyanganisa kamaiso ya musebezi wabuoki, silelezo yabakuli, nikutisa kupahama kwapalo yabaoki babafelize likolo babasabeleki,” nekubulezi muzamaisi wakatengo, Cornelius Weyulu.

Naekelize kuli: “Taelo yene filwe ilela kubona kuli mayemo alituto zabuoki asiala asa nyazahali, nikubona kuli kuna ni silelezo ya sicaba.” Mihato yengilwe kutatulula taba yeo kikufukuza nombolo yabaituti kuitisa fa 50 fasikolo ni sikolo mwasilimo. “Haiba sikolo sise siñolisize kale baituti babafitelela nombolo yeo, taelo yeo ika sebeza kwaliñolisa leli latelela la baituti. Likolo kaufela zeñolisizwe liswanela kuba feela ni liñolisa liliñwi mwasilimo,” nekubulezi Weyulu.

Nabulezi hape kuli hakuna likolo zenca ze ka kwalulwa zabaoki, kufitela kuzibiswa hape. Kwanda zale zese lumelezwi kale kukwalula. Kukala Sope 2025, kaufela baoki babafelize lituto zabona mwanaha Namibia baswanela kupasa tatubo ya katengo pili basika ñoliswa nikuamuhelwa kuba babeleki ba makete. “Likolo zesike zalatelela taelo yeo lika amuhiwa mañolo azona akufa lituto zabuoki,” nafile mamela. Lipiho libonisa kuli hala likolo zalituto zabaoki zeñolisizwe kanako ya cwale kuna ni baituti babalikana 4 655.

Sikolo sa lituto zepahami sanaha Namibia (Unam) sesina ni baituti babalikana 426 kanako yacwale nesi ize sika latelela taelo kubona kuli mayemo alituto zabuoki hafofali.