Ozombara za Kandjoze, nḓeri ozombara zOvaherero nOvambanderu nḓe rikuta kumwe mongondjero yokumuna Otjisuta kOtjiṱiro Otjindjandja tjovaṱi novakuru vazo i yohoromende yohuurire yehi rOvandoitji, za panḓa okuhakayena nOperesindenda yOkehi, Lucia Witbooi. 

Erero ozo otji za sere okuhakayena na Witbooi, otja korutuu ndwa zire ku Witbooi. “Ondando yorutuu indwi okukutjivisa kutja ami mba hindwa i yOmutjuṋikwa, Operesindenda, Onongo Netumbo Nandi-Ndeitwah, okuhakayena na ove noruhindo roye,” orutuu okuza komberoo yOperesindenda yOkehi yomayuva tji ya ri etenga ku Tjikukutu ndwa tjangerwe kOmbara Mburaa Mureti, kehi yokumuna kokutja ngunda eye nai onguri omuhaamise wovihavero vyehika ra Kandjoze.

Omaṋangero “komatyasaneno” wa Witbooi kozombara za Kandjoze ya pitirire monḓero yozombara inḓa okuvanga okuhakayena na Nandi-Ndeitwah otjomunane wehi omupe otja korutuu ndu ve mu hindirire omueze mbwa zuko. Tjinenenene okuraisa kuye omuini motjipara tje ongurameno yazo mOtjiṱiro Otjindjandja. Nandarire kutja Nandi-Ndeitwah ongurameno ya Kandjoze me itjiwa tjinga kehi yOperesindenda Nangolo Mbumba aari ngwari Operesindenda yOkehi ndjai ungura nOtjiṱiro Otjindjandja, kaze na ku isa kangamwa omuvero kamwaha tjapo ku kaze ongurameno yazo kei i. Ootjiṋa opu za paherere okumuzuvisa omuini motjipara tje ongurameno yazo. Ndji tja kaze notjiṋa nOnḓuvasaneno yaPamwe, Ojoint Declaration, ousupi OJD. Ndji ze tja oyo kai norupe kaparukaze nOtjiṱiro otjindjandja nOtjisuta tjatjo. 

Nungwari ohunga nombatero pokati komahi ayeevari inga otja nganda okuza kongutukiro tji ye vaterasana nu ndjiri ombatero ya kangamwa omukwatera wa Namibia. Ndji hi notjiṋa nokutja eye wa ṱunwa i yOtjiṱiro otjindjandja itji tji tja ṱuna kOvaherero, Ovambanderu nOvakwena poo indee. 

Ozombara za Kandjoze ze muna nokuvara Omutjuṋkwa Witbooi otjondekurona tjimuna zo. Mu nao otji ze nongengezero yohoromende okutwa ozondekurona pokati kazo nayo nokuhina okuyandjera ohoromende okutona ozondekurona mozongwao ngunda otjozondekurona azehe kumwe aza sere okuhungama omunavita umwe uriri. Nguri ohoromende yehi rOvandoitji na indji oya Namibia ndoovazu nambano oyo kai tji nozonḓero zawo otjozondekurona zOtjiṱiro Otjindjandja komutima wayo. Ozombara za Kandjoze opu za vangere okuhakayena notjiuru tjehi otjini omurungu nomurungu okuyarura otjiṋa tji kuye. Nokuhina okuyandjera Witbooi okuungurisiwa i yohoromende okutonwa muzo na mongondjero notjirwa tjOtjṱtiro Otjindjandja.