BUKALO – Mandu amashumi aketalizo nafumani lisebelezo za mulilo wa magesi kuzwelela kwa kampani ya Nored. Mulilo wa magesi nomunyehilwe simubuso Labutanu ki likwambuyu wa zwelopili ya libaka za litolopo ni matakanyani James Sankwasa. Mwa manzwi ahae likwambuyu naitumezi kwa kampani ya Nored ni likolo la milafo ni mulilo kakutahisa mulilo wamagesi mwa komponi ya Shack Dweller kwa Bukalo. 

“Mulilo wa magesi kiwabutokwa kakuli ulumelela banabaluna kuba ni makompiuta, kukona kusebelisa intaneti fobakona kufumana libuka zakubala zesakonwi kufumanwa mokubulukwa libuka. Bakona kubala lihola zetelele, hakubapanywa ni mwalinako zaluna hane nikena kwanu hane lubelekisa makandela ane alutiseza butata mwa meeto,” nekubulezi Sankwasa. 

Likwambuyu nasusuelize sicaba kubabalela lisebelezo zetiswa kimubuso. “Halukoni kuhasanya mapokola mwa naha kaufela kufelisa busholi. Kono kakuba bayahi banaha ye, kakuba sicaba haiba inge luitama kuli luka babalela zeli za mubuso – nikaba mupokola nikubiha yeni kabona kaufela asinyasinya lika za mubuso. Namikupa kueza cwalo,” nekubulezi Sankwasa. 

Naekelize kuli haiba sicaba sisa babaleli lika zetiswa kimubuso “kiluna babaka nyanda. Haiba waya ya kopa inze iuzwiwa mwa Bukalo, kutalusa kuli mandu haka yahiwa haluna kuba ni mulilo wa magesi mwa makululu, hakuna kuba ni liseli kakuli liseli kinto yabutokwa mwabupilo bwa mutu.” 

Nabulelazeokusupakwakuekezeha kwa busholi bwa mawaya akopa. Kasamulaho mitangana bababeli nebakile baswaliwa mwakezo ki mapokola basweli kuyepa mawaya akopa kwa Bukalo viki yefelile. Nebakile ba zibahazwa kuba Siyanga Muchila walilimo zemashumi amalalu kazesilezi ni Ntuka Lilato walilimo zemashumi amabeli kazelobapeli. 

Kanako yeswana Sankwasa nakile atuba mubu ni ku utambeka kwa kampani ya Development Workshop, kuli ikone ku ukenisa kuli mandu alikana myanda iketalizo akampani ya Shack Dweller akale kuyahiwa. “Hamukaswanisa ni kubeya ma maka, mulemuhe kuli batu babaleka mandu ao, zazi leliñwi baka kwanisa kuleka motikala. Zazi leliñwi lubasi luka hula, kamukwa ocwalo mubu obafiwa uswanela kuba kuli kwapili bakona kuyandulula,” nekukupile Sankwasa. 

Hanabulela kanako ya ku amuhela mubu yabona za purojekiti ya kuyaha mandu a Shack Dwellers Kalomolokamwe Angusto naize baitamile kubona kuli mandu ayahiwa. “Mandu apili afelile ni kutambekiwa kwa beñi baona. Kakulo yabubeli yakuha mandu itatekile mi luitama kubona kuli mandu kaufela ayahiwa kanzila yelukela. Lwaitumela kuli Katengo ka Munzi wa Bukalo kalufile mubu wakuyaha mandu amyanda iketalizoho. 

Mubu olufilwe wo, hakitekiso feela kono ki kolo ya cinceho yelulela kusebelisa hande hahulu. Mulelo waluna kikuyaha mandu kaufela aka konahala kuyahiwa famubu wo, haiba haluna kuyaha kaufela. Ili kuli mabasi amañata akone kufumana maino sakata ni bukamuso bobunde,” nasepisize.