KONGOLA – Mandu alikana mwanda ka amashumi asupile ka iliñwi ane abeilwe mulilo wa magesi namunyehilwe simubuso Labulalu. Hane abulela kanako ya kumunyeha mulilo wa magesi simubuso, muinasipula wa katengo Shackdweller kwa Kongola, Vionah Bafumisi, naize katengo kasweli kusebeza katata kuyaha mandu kwa Kongola.

Natolokile kuli ka silimo sa 2009 sicaba nesi kopani hamoho kutateka komponi ya Twalitumeli. Kasilimo sa 2020 seba fumana sikoloti kwa katengo ka Shackdweller kuli bayahe mandu alikana mashumi amalalu ka aketalizoho. Sebato yaha hape alishumi ka alobañwi.  Mwa silimo sa 2022 seba yaha alikana mashumi amalalu ka aketalizo. Unumwaha bakonile kuyaha alikana mashumi amabeli ka asupile, ili kutisa palo fa mandu alikana mwanda ka alishumi ka asilezi.

“Luna ni mandu alikana mashumi alobapeli ka asilezi anyatezwi kuli ayahiwe. Kacwalo mandu afumani mulilo wa magesi ki amwanda ka amashumi asupile ka iliñwi. Mandu kaufela mwa komponi hakopana ki amyanda yemibeli ka amabeli,” nabulezi. Na ekelize kuli basana ni limembala ba balikana myanda yemilalu ka bamashumi aketalizo ba ba iñolisize babasina mandu, bakeñisa kuli hakuna mubu.