OLUNO-Omukulunhu wopolifi moshitukulwa shaShana Commissioner Naftal Sakaria okwa kumaida oovene veendingosho opo ka konge omikanda dokulandifa omaludu shaashi omukanda wondingosho owa fimana.
“Ngeenge omunhu e na omukanda wondingosho ota landifa omaludu a mangaluka,” ta ti.

Edi Sakaria okwe di popya pefimbo kwa li a shakeneka ovanangeshefa novakalimo va dja modoolopa yaNdangwa oshivike sha dja ko.
Ovakwashiwana, ovanambelewa va dja koikondo ya yooloka okwa  li vangudumama kOluno okukundafana nopolifi nghene ve na okukandeka oimbuluma moshitukulwa.

Oshiwana okwa li sha mona omhito yokupula omapulo kombinga yomayakulo opolifi.
Okwa pula oshiwana opo shi longele kumwe nopolifi okukandeka oimbulumano moshitukulwa.
“Ka leni muna eenomola deengodi dopolifi efimbo keshe. Lopoteleni opolifi oimbuluma pefimbo,” ta ti.

Sakaria okwa popya ta ti ombelewa yaye oya lopotelwa kombinga yovalumenhu vopolifi tava longifa ombumbo.
“Ovapolifi vovakainhu ka ve hole okupewa ombumbo ashike ovalumenhu ovo unene tava tyakaleke,” ta ti.
Okwa lombwela oshiwana opo shi lopotele ombelewa yaye ile ovakulukunhu koitaashi shopolifi kombinga yovapolifi tava pewa ombumbo.
Sakaria okwa ti oshiwana shi kotokele okatoo noshoyo oku li kaleka kokule nokulonga oimbuluma.
 Commissioner okwa kumaida ovalumenhu opo va ka konge omakwafo kopolifi ile kovaxungimwenyo ngeenge tava hepekwa koupyakadi wopamadilaadilo ile kovakulukadi vavo.
“Omahepeko omomaumbo naa lopotwe pefimbo opo ovanhu va dule okukwafelwa diva,” ta ti.
Pefimbo ve li komutumba, Sakaria okwa lombwela ovapolifi opo va ya kule nawa oshiwana.
“Ngeenge omunhu ita ya kulwa nawa kopolifi na lopotele ombelewa yange ile omukulunhu woshitaashi,” Sakaria ta ti.

Okwa lombwela ovanhu ngeenge tava ka nana oshimaliwa shihapu kombaannga opo va shivifile opolifi nelalakano lofindikilwa nokuamenwa kopolifi.
fhamalwa@nepc.com.na