MAOFISA baba bona za limela za nahen`I mwasikiliti sa Kavango nenze ba patehile ni mungendenge wa kufitisa man`usa ka mulelo wa kuluta sicaba kaza butokwa bwa likota ni kulatelela mulao ka mulelo wa kubona kuli kulobaka likota isi ka mulao kose kupahami hahulu mwasikiliti sani kukutela fafasi.
Muofisa ya bona kaze kaufeela mwatolopo ya Rundu, mutompehi Mwiikingi Jonas na kile a taluseza ba mutayi wa Nampa kuli mwamazazi a felile sihulu fa mukiti wa Paseka, limpangako ze nee ze tuna ze swana neli kilwe za bihiwa kwaofesi ya hae.
“Nelu amuhile batu lin`ata-n`ata za likota mwamazazi a felile mi bunata bwa bona batu ba nenze ba lwalile likota ze isi ka mulao kakuli neba sina man`olo a simubuso aba lumelela kueza cwalo,” ne kubulezi Jonas.
Na ekelize kubulela kuli, ni mapolu a matuna a zibahala ka matimba ni ona nanza fumanelwa bayahi mi bao bene ba fumanwa ni zona likota ze kaufeela isi ka mulao nenze ba swelwi kuno tamiwa ni kulengwa mwatolongo.
Na talusize kuli bun`ata bwa batu nenze ba swaliwa mwanako ya busihu ni mwalihola za kakusasa.
Mwasimpangaliko se sin`wi sa mwamazazi a cwale, simbayambaya sesi tuna nesi kilwe sa swaliwa mwanako ya busihu inge si longile likota za timba ze taluswa kuli kiza bwima bwa mashilin`I bobu likana N$15 000. Timba ne amuhilwe lifosi ki maofisa ba limela za nahen`i mi libangoki neli tamilwe onafo.
Jonas na kile a nitifaza kuli mungendenge wa kuluta sicaba kaza butokwa bwa likota ni kuba sabisa kuitenga mwalimpangaliko ze cwalo isi ka mulao uta zwelapili ni mwamazazi a cwale haisi ha uta tisa miselo ye bonahala.
“Lu bata kubona kuli batu ba latelela mulao ni kusiya limpangaliko za bubangoki ze,” na kile a tumusa.
Ze ni halilicwana, ba latiwa ba beli neba kile ba matela mwamushitu ni simbayambaya nese si tezi likota za kuola kasamulaho wa kubonana ni maofisa ba nahen`I kakuli neba sabile kubuzakiwa hamohocwalo ni kusaba mulao.
Maofisa ba kulubela kuli, ba latiwa ba beli bao nenze ba longile likota zeo isi ka mulao kona hane ba kile ba maata ni kukena libumbu.
Litohonolo la bona neli sika bonwa ka bumai kakuli simbayambaya sa bona nesi kile sa kakatela mwalibumbu ko neba izo maata hape mwasimbayambaya ka mautu. Simpangaliko kaufeela nesi kile sa bihiwa kwamapokola ili bao base ba patehile ni litukiso kaufeela hamohocwalo ni muzeko.