Marythar Kambinda
Kutokwa masheleñi akukonisa Sibaka sakutahisa zwelopili kwamatakanyani sa Zambezi, kuli sitaleleze mulelo wateñi wakutisa zwelopili kwabilaeza, nekubulezi limembala zalipolitiki zasikiliti. Ngambela Saara Kuugongelwa-Amadhila hanali mwasikiliti sa Zambezi viki yefelile napotezi sibaka seo.
Muyemeli wasilalanda sa Katima Mulilo ya Matakanyani Warden Simushi, naize kuna ni libaka zetalu zakutahisa zwelopili mwanaha ili zefumaneha mwa Ohangwena, Kavango ya Wiko ni Zambezi. Naize libaka zepeli kwanda Zambezi lifumana masheleñi.
Simushi nabukezi hape kuli Khuta ya Mafwe ne neuzi mubu mwasilimo sa 2014 kuli sibaka siyandululwe, kuli sikone kualabela kwalitokwahalo zasicaba, kono hakuna masheleñi akuyandulula sibaka.
Muyemeli wasilalanda sa Sibbinda Micky Lukaezi, teñi muyaho ufumaneha ili kwa Masokotwani, naize mulelo neli kuli muyaho ona ni mubu walihekele liketalizoho, ukone kumbweshafaza mayemo asicaba mwasikiliti sa Zambezi.
“Mulelotuna wamuyaho kikufa zibo yetokwahala nilisebelezo zakamuhelo mi usulelwa masheleñi kilikolo la zwelopili yalibaka zalitolopo ni matakanyani,” nabulezi.
Lukaezi naize purojekiti nekalile kakusulelwa masheleñi alikana N$574 244 sina hasifumaneha kwamatakanyani.
Kalulo yabubeli nekalile silimo sa 2019 kakuyaha muyaho wakukopanela, maofesi, lihapehelo ni libulukelo, mi nesulezwi masheleñi alikana bolule balishumi.
Kalulo yabulalu ikakala silimo se kuisa isaho, mi kukayahiwa zeñwi kungelelela cwalo nikuisa mulilo wamagesi kasinyehelo yamasheleñi alikana bolule basilezi.
Ulumela kuli muyaho haukafela ukatusa kulwanisa bubotana mwasikiliti.
Tokwahalo yamasheleñi nebilaelize Kuugongelwa-Amadhila mi nasepisize kuikambota ni likolo leliyelela.
“Kusalikanelela kwakuaba liswanelo kutisa butata kwasicaba. Mutu ni mutu kiwabutokwa mi sicaba hasiswaneli kuboniwa kuli kimutiyo. Lulemuha butokwa kuli muyahi kaufela wanaha Namibia uba ni kabelo mwakutahisa zwelopili. Lukumalezi kubona kuli libaka kaufela zanaha Namibia lizwelapili,” nabulezi.
Nabulezi hape kuli libaka kapa miyaho yakutahisa zwelopili kiyabutokwa mwakutisa zwelopili.