Mubihi wa Mutende
WINDOKO – Ndwalume wa tukuluho niyanali mwatolongo mwasioli sa Robben nyandi Andimba Toivo ya Toivo ukatompwa, libala la lifulai la Ondangwa halikabizwa kalibizo la hae. Libala lika bizwa kalibizo la hae kukala la 22 Muyana ili lizazi lakupepwa kwahae. Mubakweli ku mueteleli wa naha Nangolo Mbumba uitekezwi kuyozamaisa kezahalo yeo. Mwakweli ya Sikulu 2014, kupo nefilwe yakuli libala la lifulai licincwe kuli kutompwe yanali ndwalume wa tukuluho Herman Andimba Toivo ya Toivo, mi kasamulaho wakutimela kwahae mwakweli ya Mbuwana 2017, lingambolo zeo zazwisezwa pata mi katengo kakamaiso yamuuso kato nyatela mulelo wo ñohola. Mi katengo kakabona zamabala alifulai kakalisa litukiso zakucinca libala la lifulai ili lelika zibahala ka Andimba Toivo ya Toivo kuzwa cwale.
“Hane lufilwe kolo yakuli luzwele pili nelukalile litukiso zekatisa kutabela lizazi labutokwa kutompa ndwalume wanaha ye. Luikutwa masisi kuli babakafita kanzila ye kuya kwalibaka zeñata bakaba nikolo yakutalusa kuli nebakonile kuba nikolo yakubapanywa ni mutu wabutokwa Andimba Toivo ya Toivo,” nekubulezi muina sipula wakatengo kamabala alifulai Dr Leake Hangala. Libala la lifulai lene lilunduluzwi kasilimo sa 2015 lina nimandu sakata, sintolo sesi apeha lico, kalulo yakucinca masheleñi, lipula sakata zakuina, limotikala zakukalima ni mayemisezo sakata alimotikala. Hala litaba zakale zana ezize, Andimba Toivo ya Toivo neli membala wabatateki bakopano ya Swapo. Kasamulaho akulukululwa kwasioli sa Robben kasilimo sa 1984, Ya Toivo nakumalezi kuyaha naha Namibia yelukuluhile, mi nabile muñoli yomuhulu wa kopano ya Swapo ni likwambuyu wa makolo abalwa mwamuuso.