SWAKOPMUND – Bazekisi (justices) ni batatubi (assessors) ba palo yefita fa mashumi a malalu ni ba ketalizoho kababa ne (39) kuzwelela mwa likuta za sizo mwa naha kaufela nebaputahanezi kwa mukopano wa mazazi amalalu kwa Swakopmund, wo neuetelezwi ki likolo la Mulao (Ministry of Justice). Mukopano wa lituto wo neukwaluzwi simubuso la Mubulo ki nduna wa likolo la Mualo,Utoni Nujoma, neulelezwi bazekisi ni batatubi kamo ba swanela kuzamaiseza likuta za sichaba, kuňola likezahalo sakata, ni kualabela kwa litaba za mashelenyi mwa likuta za sichaba ka swanelo. Kakuya ka Nujoma, Likuta za Sichaba libapala sanda sabutokwa mwa kubukeleza buiketo mwa naha kakufukuza kwa litaba ze itimbakile milala mwa likuta za sikuwa.
“Likuta zeo lina ni maata a kuzekisa ni kutatuba litaba za kulifela mutu lisinyehelo, ni kaňi kapa kangisano ya kusautwana mwahali a sichaba. Lubata kuli basebelise milao ya sizo sina mwene isebelisezwa kwa simuluho. Kacwalo waluna musebezi ki kutusa sichaba kubupa likuta ka swanelo itaba kuta ya mwatasi a kota, muyaho wa sizo kapa mwa liofisi. Lufa lituso za mashelenyi kwa likuta zeo. Lulifa penenyana ya kulifa ba ňoli babona ni batusi ni litifo ze fiwa kwa ba Atuli kakuya ka lihola kapa mazazi abasebelize,” Nujoma atalusa. U ize, kukona kueza zeo kaufela kutokwahala sibupeho sesiotolohile sesi lifiwa ki likolo la habo. Kacwalo luswanela kuba ni buikalabelo ka pene ya likuta zeo kalibaka lakuli ki mashelenyi a sichaba. Luba luta liseli la kubupa musulo wa mali (budget) ni mwa kusebeliseza hande musulo wa mali ni kukona kuba ni buikalabelo mwa nako yeswana, inze basweli kusebeza kakuya ka sizo sa bona,” kwa bulela Likwambuyu.
Nujoma u zwezipili kutalusa kuli lituto litatusa babupi ba milao ya sizo kukona kuňola likezahalo sakata ni kuzwelapili kuba fa lituto za milao ya sizo. “Taba yemwi ki ya kuňola milao kuli kwa pata lukone kutaha ni milao ye namalalile yeo itasebeliswa mwa likuta za sizo kaufela,” kwa ekeza Nujoma. Seo sitalusa zibo mwa mulao mi Namibia ina ni bo chaziba mwa buňoli bwa milao kuli ikone kubukelezwa