SIKAUNGA – Sikolo sa Sikaunga mwa silalanda sa Kongola mwa sikiliti sa Zambezi sifumani lituso cwalecwale. Labutanu sikolo nesi fumani neulo ya sisupo sa litapa, patululo ya litaelo zabutokwa zemamelwa ki sikolo ni tundululo ya kilasi kamasheleñi alikana N$25 000, kuzwelela kwa kampani ya Ichingo Lyobwami.

Mwa manzwi ane abalezwi ki muzamaisi wa likolo zewela mwa silalo sa Sibbinda Gabriel Muleta, Muzamaisi watuto mwa sikiliti sa Zambezi Alex Sikume, naize neulo kuzwelela kwa kampani ya Ichingo Lyobwami, ki susumezo ni kemelo ya zibahazo ni kupuzo ya kazazi hala lika zabutokwa ze paka bayahi banaha Namibia.

“Ona sisupo sa litapa nesi konile kutahisa kuli baenyi bane bazwa kwanaha Netherland bakone kulemuha kubateñi kwasikolo mi neba konile kuswalwa maikuto kuli bakone ku neulela sikolo ni lipula ni matafule,” nekubulezi Sikume. Nasupa kwa neulo kuzwelela ku Irma ni Marco Simonatti ba ba simuluha naha Netherlands bane baneuzi lipula ze 288 ni matafule anombolo yeswana. Bana basikolo hape nebafumani neulo ya makatulo alikana 168 kuzwelela kwa Purojekiti ya Never Walk Alone.

Muetapili wa kampani ya Inchingo Lyobwami Evans Maswahu naize neulo yeo neli tusonyana ya kampani yabona ya kukutiseza sicaba.  “Lukolwa ni kulumela kuli kukatusa kuli sikolo sibonahale mi kilasi ikatahisa kuli baituti bakenele moku inzi hande. Nahupula hanitaha kwa sikolo lapilli, neni latehile mi neni fitelezi. Seni lemuha kuli sisupo sa litapa kisa butokwa,” nekubulezi Maswahu.

Maswahu nakupile hape makampani amañwi kunga mutala niku eza moba konela kaufela kutusa sicaba sa naha Namibia. Yomuhulu wasikolo sa Sikaunga Patricia Lutibezi naitumezi kwa lineulo zeo sikolo sifumani. 

Natolokile kuli sikolo sesina ni baituiti ba 271 sisa talimani ni butata bobucwale ka kutokwa simbule sakata sa mezi, kutokwa makilasi bakeñisa kuhula kwa nombolo ya baituti, kutokwa muyaho wakamaiso, lisebelezo za limbuzi, mahaulo ashwile ni lukwakwa lwa sikolo.

Nabulezi hape kuli kanako yacwale bulilo bwa makilasi ni mamota lisweli kulundululwa, katuso ya batu bane baitombozi kuneulela sikolo.  “Tundululo yeo itaha katuso yabane balu neulezi kakuli bulilo nese bushwile mi neli kozi kwa banana ni maticele bakeñisa misima yene fumaneha mwa makilasi. Nisa kupa babakona kutusa kuli batuse sikole se,” nekubulezi Lutibezi.