WINDHOEK – Katengo kaka lwanisa litaba za bulyangalino katalusa kuli, lipatisiso kuamana ni mabulatu akuli bao baetelezi katengo katolopo ya Katima Mulilo ba baipile mibu bona baňi ni mabasi abona feela linze liatumela kufita kwa maungulo. Muzamaisi wa Katengo kakabona za bulyangalino Paulus Noa, u taluselize mutai wa mutende wa New Era mabaani kuli lipatisiso za bona lifumani kuli buňata bwa lianda za mibu ya mayahelo nelifilwe kakulatelela milao ye filwe ni mo kuswanelela. Lipatisio zeo litisizwe kulatelela mabulatwi akuli ba zamaisi ba katengo ka tolopo batulile milao kaku fa mibu ya mayahelo kwa babeleki, ni kwa bayahi ba tolopo ba mayemo sakata, ba bangelela yena muňoli wa tolopo kasibili Charles Nawa, yo u akalezwa kuli u luwile libaka ze peli za lipisinisi, simu ya butuna bobulikana lihekele ze ketalizoho ni libaka za mayahelo zemwi ze peli zeo liňolisizwe mwa libizo la mufumahali wa hae ni mwa libizo la kezela hae. Ni cwalo, lipatisiso lilikile hape kutalima mukwa wo mwana a mayor wa tolopo Charles Matengu nakonile kufiwa musebezi wa kuyaha ndu ya malobalo abapoti ya katengo katolopo fa mali afita fa likiti ze miaanda ka likiti ze ketalizoho (N$ 500,000). Ku akalelizwe kuli musebezi wo neufilwe ku mwana a Matengu mwahali akweli ya Sikulu (July) ni Ňulule (December) silimo sa Ňoholatula (2012).
Bayahi ba tolopo nebabilaezi kuli likupo za mubu za mabasi a bao basebeza mwa katengo katolopo neli fitisizwe mwa mulaho kubapanya ni babilaeli, kono neli ankufisizwe kusiya likupo zabao benebali fa mukoloko wa babalitezi kakutatamana. Nowa u ize bupaki bwa mapepa ao ba amuhezi kuzwelela kwa Likolo lelibona za zwelopili ya Litolopo ni Matakanyani (Ministry of Regional and Local Government, Housing and Rural Development) ao asupeza libaka ze liswanela kuzusezwapili, asupeza kuli libaka za mubu zeo neli akalezwa nelifilwe kaku latelela milao mi likupo zeo neli nyatezwi ki katengo kaka zamaisa tolopo (council) niba likolo kasamulaho baluwi bazona libaka zeo se bafitisize likupo za kulekisa, kapa kubapaza fa misika kubao batabela kusebelisa libaka zeo swalelele. “Bayahi neba fitisize lipilaelo zeňataňata. Ka cwalo neluile kwa kubatisisa ni kubona kuli haiba lipilaelo zeo lina ni buniti. Nako yeo lufumana mapepa kuzwelela kwa Likolo, se lufumana kuli libaka zemwi zeo kuzona nekufitisizwe linonge neli filwe kamuka oswanela. Luna ni libaka za maino zepeli feela zeo lutokwa lipatisiso fateni mi lusalitezi feela mapepa a amana ni monelifezwi kwa baluwi bazona, kapa nafilwe kamukwa oswanela ni kuli haiba neku lumelelezwi kueza cwalo,” kwa bulela muzamaisi.