Okwa lopotwa ovanhu 1 562 ve li koitukulwa ngaashi Oshana, Omusati, Oshikoto nOhangwena va tambulilwa moipangelo molwaashi va kwatwa komalaria.
Ovanhu ova tambulilwa koipangelo ya yooloka monooli.
Oshitukulwa shaHangwena osho shimwe shi na ovanhu vahapu va kwatwa komalaria ve li 5 808 omanga ovanhu omuwoi ova xulifa.
Oshitukulwa shaShikoto osha lopota ovanhu 1 080 omanga ovanhu omuwoi ova xulifa. Oshitukulwa shaShana osha lopota ovanhu 335 novanhu vahetatu va xulifa.
Omukulunhuwiliki wouhaku koshitukulwa shaMusati, Alfons Amoomo okwa ti oshivike sha dja ko moshitukulwa shaye omwa lopotwa ovanhu 346 va kwatwa komalaria, nomunhu umwe a xulifa. Ounona, ovanhu okudja peedula 20 fiyo 40 ovo unene va lopotwa va ninga oihakanwa yokukwatwa komalaria.
Amoomo okwa ti ovanambelewa vouhaku moshitukulwa shaye otava longo nondjungu okukondjifa malaria momidingonoko.
“Otwa tameka okuyandja ehongo nouyelele koshiwana nghene shi na okukelela malaria,” ta ti.
Okwa yelifa ta ti oshitukulwa shaye osha taalela eshongo leenete deemwe inadi wanena okutopolela oshiwana.
“Otu na ovanhu va tembukila keetenda molwonghalo yefundja ashike otava lika keemwe,” ta ti. Omukulunhuwiliki wouhaku kOshikoto Joshua Nghipangelwa okwa lombwela oshiwana opo shi liufe komilandu dokukelela malaria nosho yo okulopota pefimbo ovanhu tava ulike omadidiliko amalaria. Okwa ti osha fimana ngeenge omunhu a kwatwa komalaria ile ta ulike omadidiliko ta lopotwa pefimbo opo a dule okupewa omayakulo opaunamiti.
Nghipangelwa okwa ti ombelewa yaye oya lopotelwa kombinga yovahu vamwe inava hala okuya koshipangelo ngeenge va kwatwa komalaria. “Oshiwana nashi longele kumwe novanailonga vouministeli wouhaku, vo tava topolelafanene ouyelele nehongo momikunda kombinga yamalaria,” ta ti. Okwa ti ouministeli wouhaku onghee ngaa tau twikile nokuyandjaneke eenete dokulela eemwe nosho yo oprogarama yokupombela momaumbo nokuyandja ehongo nouyelele. Okwa ti ovanhu nave lituvikile meenete dokukelela eemwe.
“Oshiwana nashi longele kumwe novanailonga vopombela molwaashi osha fimana ngeenge momaumbo tamu twimikilwa opo ku kelelwe etandavelo lomalaria,” ta ti.
Pefimbo Kundana a talela po ovanhu ve li keetenda ova hokolola tava ti ova taalela eshongo lokulika keemwe molwaashi eenete inadi wana. -fhamalwa@nepc.com.na