ONGWEDIVA – Muzamaisi wasipokola sa naha Joseph Shikongo uize mapokola baka lemusa sicaba hala litaba zetumile hahulu. Kungelela cwalo lipiho za batu ba ba tondahala ni busholi bwa kwa kampani yebona za tekiso ya daimani mwa Namibia (Namdia). Manzwi a Shikongo ataha kasamulaho aliviki zepeli za kukuza kwa mapokola ni kamaiso ya Namdia kuamana ni busholi bwa milafo ya butokwa, ya masheleñi alumelwa kulikana bolule bamyanda yemibeli ni mashumi alobapeli (N$280 million) ne uzwizwe.

Mwangambolo viki yale, naitumelezi kuli sicaba sitokwa temuso, sihulu fa litaba zesika tatululwa. Nasupile busholi bwa kwa Namdia bone bu petilwe kweli yefelile kwa liofesi mwa komponi ya Klein Windhoek. “Lukafa litemuso hala taba ya Mandela Nakale, mwanana wamushimani yana tondahalile kwa Lüderitz mwa kweli ya Ñulule 2020,” Shikongo nabulezi. Nakale natondahalile hane ana ni lilimo zetalu.

Shikongo nahatelezi butokwa bwa kulemusa sicaba hala litaba zesika tatululwa zabubulai, kungelela cwalo ni taba ya mwanana walilimo zesilezi Oswyn Myne, situpu sa hae sene sipumile libindibindi nesi fumanwi mwa mulapo wamutabani mwa Karibib mwa silimo sa 2022. Nasupile cwalo pulao ya Magdalena Stoffels, yana bitelezwi nikubulaiwa mwamulapo mwa Windoko hane alibile kwa sikolo mwa silimo sa 2010 hane ana ni lilimo zelishumi kazesupile. 

Kuekeza fo, Shikongo nasupile pulao ya Avihe Ujaha, yo situpu sa hae nesipumakilwe ni kuhasanywa mwa Katutura mwasilimo sa 2018. Naize mapokoala bakafa temuso hala taba yeo, mi naize ki kwabutokwa kuli sicaba sa lemuswa kuli si zibe zeo mapokola ba ezize. 

Nasusuelize sicaba kubeleka ni mapokola kaku ikabela ni bona zeba ziba zekona kutusa mwa lipatisiso. “Ki kwabutokwa kuli sicaba si swalisana ni mapokola kulwanisa bubangoki. Kutisa kuli musebezi wamapokola ube bunolo,”nabulezi. Naekelize kuli batu baswanela kubiha lipiho za bubangoki kabunako, sihulu lipiho za kubitelela.