Tji tja putarisa ohoromende nai ndji ri komananeno okuhina okuripurira ku imba mba yekerwe ehi.

Orally for Democracy and Progress, ousupi ORDP, mai raisa nao morutuu rwayo rwokupaha oruvara komatoororero wa Tjikukutu nokutja oyo tji ya kambura ohoromende oviṋenge ovingi mbya tjama nomananeno wohoromende mai honine vi.  

Muvyo vyotjikoro mu mu nombwiko, omahongero; ouveruke; otutumbo novikunwa; omatungururiro wehi; otjitamba tjovaryange nongaro yopokati komahi nouye.

Munao opu mai tjere rutenga maku sokutarewa ku imba mba yekerwe ehi na imba mbe nombango yokuriungura. Ngunda amai zeuparisa ongunḓe yokuranda nokurandisa ehi otja kouvange noupupurukwe wovarandisasane, mai tara motjiṋa hi nokuzikamisa okomisi ndji mai varura nokutarurura oupapi nouparanga ehi arihe mehi. Nokuhino’kururuma poo okuyepa ozongunḓe.

Tjimuna okusembamisa ombwiko onḓikame yomahandurisiro; yokuhara ehi; omekurisiro woviungurisiwa; okukayenda pu novaṱuta okuvetumburira mondjira ndji ri yo; omaupikiro nomahongero movyouṱuta. 

Na wina omahaṋeno wehi ohakahana nomaparanga nohoromende okuhara ehi rokuhandurisa kOvanamibia ovanauhepe okuyarurura ovihahambunda omahausemba worukapitaveze. 

ORDP mai vara kangamwa ehi otjongwizikiro kutja omuini waro ma yenene okuriungurisa otjotjiyambekewa tji ma vanga okuyazema otjimariva tjomekurisiro wehi re kotutu twovimariva. Mai nakaura kaparukaze ehi mOnamibia kovandu vomauye wopendje. “Mai tjindi Ovanamibia avehe ovahepe nu mbu mba sere okutjangwa pu pe ṱa nu ai ripurire komahandurisiro wawo pu kangamwa oruveze mOnamibia aihe. Ngunda wina ovahandurisiwa avehe amave pewa otjimariva tjokuuta nu mai twa po ombwiko yomahandurisiro komekurisiro woviungurisiwa, okutarera popezu ovahandurisiwa nokuvetumbura nokuveupikisa. Otutu atuhe twotjimariva twohoromende tjimuna Ombaanga yOtutumbo nOvikunwa, matu heperwa okuyakura ehi rakangamwa otjotjiyambekwa.