Omupresidente Nangolo Mbumba okwa tanga nokuyandja etumbaleko kovakondjelimanguluko Themus Cosmos Nkandi naPaulus Epafuras ovo aveshe va xulifa omwedi ou.
Nkandi okwa fudikwa Etivali komaendo Omugulugombashe moshitukulwa shaMusati.
Okwa xulifa momafiku 12 Januali 2025 koshipangelo shaShakati, mepupi lomido 77. Moshipopipwa shaye osho sha leshwa Etivali ponhele yaye kungoloneya waMusati Erginus Endjala, Mbumba okwa ti momudo 1974 Nkandi okwa waimina ongudu yoSwapo pefimbo Namibia kwa li a ponokelwa keembulu dokatongotongo daSouth Africa.
“Okwa kala nokuxwaxwameka ovakwaita vakwao opo va longe noudiinini okulwifwa eembulu dokatongotongo,” ta ti.
Okwa weda po ta ti Nkandi okwa li omukondjelimanguluko e na olukeno shaashi kakwa li e hole Ovanamibia tava dengwa keembulu. “Nkandi okwa kufa ombinga momadeulo oukwaita a yooloka. Okwa li e litula mo pamwe novakwaita vakwao,” ta ti. Nena natango, moshitukulwa shaMusati oku na efudiko lopapangelo lomukondjelimanguluko Paulus Epafuras ou a xulifa momafiku 10 omwedi ou koshipangelo shaShakati. Mexulixuloshivike omukondjelimanguluko Sacky Amunyela weedula 75 naye okwa fudikwa komukunda Onayena moshitukulwa shaShikoto.