Auleria Wakudumo
Nonande vamwe va tula omutwe kepepe eshi omaumbo avo a ya koshi yomeva, Fransisco Joseph ota twikile okukondja apa ta dulu opo a hange epangelo ondjilakati.
Joseph (30) omukalimo womOshoopala, oo eli paife keetenda kEhenye mOshakatiu okwa ti keumbo okwa yaukako nongeshefa yaye youkuki, ouleke,oubisikiti naikwao opo a twikile okulandifa.
“Nonande ongeshefa itai ende nawa ngaashi nale kwali handi landifa modoolopa, shama ashike nda landifa kashona aka nda landifa mefiku oshi dulife ashike inandi landifasha,” Joseph ta ti.
Joseph okwa ti okwa mona omhito ya wapala okulandifa kovakwashiwana ava veli peetenda. Oha piti ongula ta teleke oukuki opo a shiive okulandifa momukokomoko wefiku.
“Ohandi landifa nande oN$10 mefiku ile efiku eli la enda nawa ohandi mono mo nande oN$20,” Joseph ta ti.
Pefimbo Kundana aya meenghundafana naye efimbo lomusha, Joseph okwa holola kutya okwa landifa po nale oN$4.
Joseph okwa ti ina hala okukatotolola ko eshi tai keumbo.
“Keumbo ohandi yi ndina okafilinga nale handi ongele eshi handi landifa apa. Ondishishi kutya ohatu pewa oikulya kepangelo nondelineekela kutya otali ka twikila okupa oikulya eshi hatu yi komaumbo ashike onda hala ngaho naame ndi dule okulikwafa. Eshi epangelo tali penge oikulya, ame handi shiiva ngaho okulilandela ofewa nomaadi,” Joseph ta ti.
Joseph okwa holola kutya okuna ashike oudjuu woulunga peetenda.
Okwa ti, ita dulu okukalandifa kokule notenda yaye ile ngaho a twale keenhele dimwe modoolopa apa pehena omeva shaashi ota hange oimaliwa yaye ya vakwa mo motenda yaye. Okwa weda po kutya shaashi keshe umwe okushi kutya oha landifa, ohava kala alushe tava tale omalinyengo aye op ova hade oinima yaye nelalakano okuhangamo oimaliwa ile va hala okuvaka mo oilandifomwa yaye. “Peetenda opena onghedi youlunga yii. Shama ashike weli nyenge, eshi toya oto hange oinima ya handwa ku walye. Onghene oshi xwepo okukalela oinima yange shaashi itandi dulu okukanifa oimaliwa yange ndei longa noudiinini,” Joseph ta ti.