Kuna kumoneka asi kuna kuza tukagwane uhaku wanavenye, ministeli zoukanguki kazirende mahauto gonoambulances gokusika ko 36 noyimaliwa yokusika ko N$32 nomiliyuna. Elikwamo lyangesi, ministera Dr, Esperance Luvindao katente asi, kuna kara sitambo soministeli omu vana kukatura asi vagave ukanguki pangenderera kwanavenye. Mokutura nye yangesi mosirugana, kuna kara asi mulyo unene kukara asi kuna kukeverera, yiruganeso nomokuyiruganesa momaruwa, yimo ana kutanta Luvindao. Luvindao katente hena asi mahauto aga tavagagavere nomukunda nadinye 14 mwaza sirongo nasinye.
Kugwana mahaautoi gomape kuna kara mbudi zongwa, nye, ose kuna hara kumona asi mahauto aga kuna kugakeverera momunene. Mukaro ogu gokupira kupakera sinka mahauto kunakara simwe natutarurura momunene, melikwamo eli lyoukanguki, twahena kuyirugurura asi mahauto aga vahepa kugakeverera, konomukunda oko gana kuza pakare malikwamo ntani kugaruganesa nawa. Kugusako oyo hawe kapi natukayipulisira nampili nakauke,; yimo ana kuhuyunga Luvindao.
Age kuna kara nehuguvaro asi ezuva limwe ngakatura pasirugana paveta omu sirongo ngasiruganesa nodira asi ambulances. eyi yina kara nye asi kapi ngatuzumbanesa mwenyo gomuntu morwa kapi kuna kara ugendero wopangenderera, age kuna kutanta asi ngayikara nye asi ugendero pankwangu pokatji keperu ndi nomfa domuveli.
Noambulances edi nadivatera vantu vatunga modoropa ntani woponze zodoropa, omu yina kara asi kwato muntu ogu ngava sigako asi morwa kwato ugendero wopankangu. Mukurona gosipangero momukunda gwa//Kharas Dr. Refanus Kooper, katambwireko mukaro ogu omu vana gavere mahauto aga, asi awo kwanana noudigu nomvhura dononzi nye ngesi hawe vana vagusako udigu umwe.
‘’ Ose kunana noudigu mokutura asi turete sirugana esi pepi novantu. Apa nye ngesi tuna randa noambulances edi, age katente asi nodigusapo udigu ou tuna kara nawo melikwamo eli lyouhaku, nonkango edi kahuyungire gumwe govahakuli age ana hafa unene.
Kooper katente asi Luvindao kuna kuhundira asi twahepa kukakeverera mahauto aga, morwa ago tagakarugana novili nadinye kwato klupwizumuka yipo tugave uhaku kovaNamibia navenye ntani vadinguli vetu.
Omu nye natukagaruganesa twahepa kuyitara momunene, nokugaruganesa sitambo sago, yimo ana kutanta ngoso. Moomu tupu nye yakara monzodi zetu zo 2030, omu ngatukakara nouhaku wanavenye wokuhetakanena, Luvindao katente asi ministeli kuna lituramo unene mokutara asi tukare nomatungo, varugani ntani udivi morwa nayinye eyi kwakara ure nosipangero, kwato muNamibia nadogoroka.
Mukaro nye ogu twakere nago asi kwato ambulance yina kara nye yanare oyo, moomu ayihoroka asi vamitili kutwara munona kosipangero nepu tavere nehauto lyamwene kutunda nye koOmega 3, moBwabwata National Park dogoro koChetto eyi yina kara asi kusika ko50km vakasike kosipangero sopopepi.
Moyitundwamo kapwagesere sayitunga zaNew Era zomoJanuary mvhura zeezi, asi vamitili kuyirugana eyi peharo lyavene morwa vakurona vawo kapi vana kuvhura kufuta ugendero ou.
Mukunda nye ogu guna kara asi kuna gugumu unene mukaro gougendero kuna kara mokunda gwaOtjozondjupa, omu guna kara asi ago kuna pumbwa mahauto 14, omu van kutanta asi dogoro ngesi awo kuna kara tupu nonoambulances ne tupu, dina kugenda.
Dimwe kunakara asi nokilo dado dazeruka unene kuna kukagendera ko 600 000 km. mukaro ogu gokupira ugendero kuna kara nye udigu unene muntu ogende, sinano sosire kutwaredera nye olirange mokurugana eyi yina kara asi pangenderera, unene komavango nye gakara ure unene ngwendi Tsumkwe.
-psiririka@nepc.com.na