MTC okwa totha mo aagundjuka aakiintu yaali opo e ya pe omadheulo okupitila mo progalama tayi ithanwa “MTC4Life”.
Taya ti oya ningi omaindilo moproyeka yoondhopi nelalakano lyokumona ontseyo yagwedhwa po yo ya vule okuya po noongeshefa dhawo.
Omolwa oompito dhiilonga dha pumba Gloria Munepito oshowo Wilhemine Thomas ayehe ya yambukile koshitopolwa shaMusati oya hokolola kutya, onkalo yokwaana iilonga oye ya thiminike ya kuthe iilonga mbyoka ya talika ko hayi longwa owala kaalumentu.
Munepito okwa ti, okwa koko pamwe naalumentu, niilonga mbyoka ya kala tayi longwa megumbo kaalumentu, inayi kala hayi mu thigi po.
“Ngele aalumentu taya tholoma oondhopi megumbo, nangaye ohandi kala tandi undula okatoololi kena evi, tandi tutu, sigo ndaka mona ndina oshifolomo peke,’’ ta popi ngaaka.
Ta ti, okwa mono ashike ta foloma oondhopi ye mwene, kaape na omuntu te mu yambindhindha.
Munepito okwa ti, kape na iilonga yaalumentu, kehe shoka tashi longwa kaalumentu, naakiintu otaya vulu okushilonga.
“Kuunongo wandje nda gwedhelwa ko oshimaliwa niilongithomwa nda yambindhindhwa nayo kehangano lyoMTC, otandi tameke oproyeka yandje yoondhopi, ngame ndi kute aanyasha aakwetu mboka yaana iilonga,” ta po pi ngaaka.
Thomas okwa ti, iimaliwa kayi na olwaala, nongele onkalo oya yaga kegonga, owuna okulonga kehe shoka to vulu okuhwepopaleka onkalo.
“Kandi hole okukala nda mwena, kaandi na shoka tandi longo. Sho nduuvu MTC ta kongo aanyasha ya ninge omayindilo ya yambindhindhwe, inashi thigandje ko,” ta hokolola ngaaka.
Ta gwedha po ta ti, okwa hogolola oshimpungu shokuninga oondhopi oshoka okwa ndhindhilike kutya aakiintu oyendji itaya hala okuninga oondhopi, onkene ompito onene okukala a za mo.
“Natango onda kala ndina ontseyo, nonando ka kwali ya gwana, ondakala ndi shi nkene hadhi foloma. Akiintu oyendji itaya hala okukala noonyala dha kukuta, taya nyenge oosamende, ashike shoka shina oshilongo, uuhupilo,’’ ta ti ngaaka.
Thomas okwa ti, okuna ondjodhi onene yoku ninga omunangeshefa gwoodhopi, naakalimo yokOmusati itaya kala we taya ka landa oondhopi ko kule.
Aakiintu mboka yaali oya pandula ehangano lyoMTC sho lye ya yambindhindha nuunongo wagwedhwa po, oshowo oshimaliwa okutameka oongeshefa dhawo, ya vule okuya po noompito dhiilonga moshigwana.
Taya kumagidha kutya kapena iilonga iidhigu, nenge inene naakiintu, omanga hayi vulu okulongwa kaalumentu.
Omupopliko gwoMTC Erasmus Nekundi okwa ti, oya totha mo aakiintu mboka sho ya ningi eiyindilo moshimpungu shoka sha pumba aakiintu.
“Oshetu tu fuula wo na se, no ta tu tsikile okuya yambindhindha opo ya pondole shoka ya hala okuninga,’’ ta po pi ngaaka.
Nekundi okwa ti, MTC okwa longekidha oomiliiona N$1.5, okuyambindhindha aanyasha yeli pevi nenge yeli moongeshefa oshoona.
Aanyasha mboka oya dheulilwa okukulula, okuhondja, okuthaneka, okupanda, okuninga iipanyala, okuopaleka iipala, okuteleka iikuki oshowo iikulya oshowo okutholoma oondhopi,
vkaapanda@nepc.com.na