Ehangano loMobile Telecommunications onghela ola nangeka oshivilo MTC Marketing Indaba, osho shi na sha nokuhonga osho yo okupa ovanyanyamaulu omapukululo nehongo, unene ngeenge tashi ya pelongifo lomalungula, momikalo da yooloka osho yo omakwatafano noikondo ya yooloka. 

Omupopi wefiku nomunangeki woshivilo eshi okwa li minista womauyelele nomakwatafano opaungoba Emma Theofelus, nokwa yandja olupandu linene kehangano lo-MTC eshi hali longo noudiinini mokutula po omakwatafano omomhepo, osho yo okuunganeka ava hava longo oilonga ya yooloka komalungula. 

“Oilonga ei kaipu. Unene okukwatafana novanhu va yooloka pamikalo dopaungoba. Okulonga novanhu vahapu unene mu heliwete navo, tamu longo ashike momhepo ngaho ohashi ya yo noinima ihapu ngaashi oukengeleledi, oulunga, nai kwao ya wedwa po,” ta ti. 

Oshivilo eshi osha e ta ovashiindalongo okudja koilonga ya yooloka, opo ve uye va yandje omapopyo avo osho yo omatwomukumo kOvanamibia, vo va yandje yo omauyelele nghee tave shi endifa koilongo yavo. 

Vamwe vomOvanamibia ava va ka kufa ombinga ovava ve hole oku mwenyeka komalungula shito, novali va pandula omhito ei neenghono. 

Jamie-Lee-Loss oo naye a li a ka ondola omesho ye a ka pwiikine okwa ti okwe lihonga mo shihapu, osho Ovanamibia ihava ningi. 

“Onde lihonga mo yo nghee tu na okuninga ongeshefa komalungula, osho yo omukalo nelaka eli tu na okulongifa opo tu mone ovanhu tave ya kufye va lande,” ta ti. 

Oshivilo eshi sha teelelika shi kale sha pwa nena, osha li sha hanganifa ovanhu okudja koikondo ya yooloka, novanhu vahapu ova dja ko nomauyelele a yooloka, unene ngeenge tashi ya pomakwatafano omomhepo. 

-taimihaihambo2000@gmail.com