Auleria Wakudumo
Mobile Telecommunications (MTC) okupitila moproyeka yaye yokuyambula po eefikola dokomikunda ota ka tunga eengulu dofikola di li 12 keefikola mbali. Tim Ekandjo wo-MTC okwa holola kutya eengulu otadi ka tungwa kosekundofikola Shaanika Nashilongo moshitukulwa shaMusati osho yo ofikola yopedu oDonkerbos moshitukulwa shaMaheke. Momukanda wa pitifwa Etivali, eefikola edi mbali oda hoololwa odo di pewe omakwafo neudo molwaomhumbwe yeengulu peefikola opo.
“Ofikola yopedu, oDonkerbos oi na ovahongwa 280 novahongi 32 ashike oina ashike eengulu dovahongwa vashona. Oya pumbwa okuwedelwa eengulu nhee opo i dule okutambula ovahongwa vahapu,” Ekandjo ta ti.
Odonkerbos oyi li koshitopolwa shokoushai shaRietfontein moshikandjojhololo shaTjombinde.
Ofikola oya pumbwa eengulu shaashi ohai tambula ovahongwa okudja momudingonoko woRietfontein osho yo okudja poushiinda poSonneblom.
Ekandjo okwa weda po ta ti osekundofikola Shaanika Nashilongo otai kanifa omwaalu muhapu wovahongwa tava tembuka molwaashi kape na eengulu dehongo da wana pofikola.
Mtc ota ka tunga eengulu hetatu posekundefikola yaShaanika Nashilongo. “Nonande ofikola ina omuhandjo, momuhandjo kamu na ovanafikola vahapu shaashi eengulu dofikola inadi wana,” Nekundi ta ti.Otaku hokololwa omuhandjo mu na omabloka 10 ehena ovanafikola. “Omabloka atano okwa tungilwa ovamati naatano oukadona. Keshe eboloka ohali kala ovanafikola 32. Sha hala okutya ngeno omaboloka aeshe omulongo okwa wana okukala ovahongwa 320 ashike kamu na omunhu shaashi kape na eengulu da wana okuhongela ovanafikola,” Ekandjo ta ti.
Okutunga eengulu hetatu posekundefikola otaku kwa kwafela ovanambelewa vehongo opo va topole ounona okudja keefikola odo dihena omihandjo okuya koNashilongo shaashi okuna omuhandjo uhena ovanafikola.
Ekandjo okwa holola ta ti ehangano loMtc oli lile po okukwafela ovakwashiwana vaNamibia.
Ouministeli wehongo owa shiivifa kutya eefikola odili momhumbwe yeengulu dokuhongela ovanafikola di dule po3 000 moshilongo.
“MTC okwa kwafela okutunga eengulu 49 moitukulwa 10. Eengulu edi oda tungwa kongushu yoshimaliwa shi fike peemiliona N$13 okudja 2019,” Ekandjo ta ti. Noneudo otava twikile okuweda ko komwaalu weengulu dofikola. Neudo, MTC otaka tunga eengulu nhee moshitukulwa shaMaheke nahetatu moshitukulwa shaMusati.
Modula taiya MTC otaka tunga eengulu dehongo moitukulwa ei ya xupa ko, oshitukulwa shaErongo noKhomas manga inava tameka okulifola oitukulwa.
“Ohatu longo mekwatafano nouministeli wehongo, twa landula landula omilandu dehongo. Ouministeli ohau tu kwafele okutofa eefikola dili momhumbwe,” Ekandjo ta ti.