KATIMA MULILO – Mapokola mwasikiliti sa Zambezi neba limbile mubeleki watuto mulatu wakuzuma isi kamulao, kasamulaho aswaliwa ni nama yanali zetalu, ilongilwe mwa motikala yamubuso yana kwaeza. Kukulubelwa kuli muuna walilimo zemashumi amane kazesilezi, mubeleki yomuhulu mwalikolo la tuto mwasikiliti sa Zambezi. Naswelwi mwa kezo alongile nama yanali yamasheleñi alikana N$60 000 busihu bwa Labulalu kanako ya 20h00 kwa Masokotwani, mwasilalanda sa Sibbinda. 

Sibuabui wasipokola mwasikiliti sa Zambezi Kisco Sitali nanitifalize kutamiwa kwahae. “Ku akalezwa kuli yakulubelwa nalobile mulao mi naezize kakulata kuzuma ni kubulaya lifolofolo zesilelelizwe,” nabulezi. Yakulubelwa nalibelezwi kubonahala mwa khuta yenyinyani ya Katima Mulilo Labutanu.