KATIMA MULILO – Muzamaisi yomuhulu mwalikolo la tuto, yana swelwi cwalecwale kakubelekisa motikala yamubuso kulonga nama ya nali, natomezwi kulifa N$20 000 yakulibelela muzeko wahae kwande, ki khuta ye nyinyani ya Katima Mulilo. Elvis Liwakala walilimo zemashumi amane kazesilezi (46) nabonahalile fapila muatuli wakhuta yenyinyani Davy Kambinda viki yefelile, atalimana ni milatu ya kuzuma isi kamulao, kulonga ni kufumanwa ni nama yanaheñi asina liñolo, ni kusebelisa ofesi kapa situlo sa hae kabulyangelino.

Nihane kuakalezwa kuli linali zane afumanwi ni zona neli zepeli kanako yatamiwa, lipatisiso neli fumani kuli Liwakala nabulaile linali zene, zateko ya masheleñi alikana N$120 000. Natamilwe la 30 Yenda kanako ya 20h00, mwa silalo sa Masokotwani mwa silalanda sa Sibbinda, alongile nama yanali mwa motikala ya mubuso. Morgan Saisai, mubeleki yabona zapukelezo ya lifolofolo mwa sikiliti sa Zambezi naize nebakalile kale balisa Liwakala, kufitela batomu lambela mwa kezo. Ku akalezwa kuli linali nailo libulaya mabapa ni Lisa la Liambezi.

Saisai napatuluzi hape kuli bamulao nebailo bandamena Liwakala kwa Zilitene, mi habalika kumuyemisa, ukulubelwa kuli abaleha, kiha bamulelekisa kufitela bayo mukwacisa ni kumulambela kwa Masokotwani. Kwanda nama ya nali yana longile, mapokola neba mufumani ni litobolo zepeli zakuzumisa, tente ni foni ya fanoka. Kambinda naisize taba la 28 Sope 2028, kulumelela lipatisiso kuzwelapili. Cedric Mundia nayemela
mubuso.