Likwambuyu wasilelezo Albert Kawana ubulela kuli mubuso uka nyatisisa katulo yaviki yefelile ya Khuta Yepahami, yekona kukwalula nzila yakuli yane ili membala wandu yamilao Geoffrey Mwilima alukululwe mwatolongo, kasamulaho alitatubo zamakete. Viki yefelile muatuli mwa Khuta Yepahami Schimming-Chase nalaezi kuli mubeleki wamakete kwatolongo ya Windoko, teñi Mwilima akwalezwi kuzwa silimo sa 1999, abe ni keto mwamazazi alishumi ka aketalizoho kapa ukula butuku bobutuna. Mubeleki wamakete uswanela kualuhanya kana kuzwelelapili kuba mwasitokisi kwa Mwilima kutopweleza butuku bwa hae.
Muatuli hape nalaezi kuli mubeleki wamakete afe kelezo kuKawana mwamazazi amashumi amabeli, haiba inge kufumaneha kuli kuzwelapili kuba mwasitokisi kutopweleza butuku bwa hae. Haiba inge kufumaneha kuli Mwilima haswaneli kuina mwasitokisi bakeñisa mayemo abutuku bwahae, kulukululwa kwahae kuka atumela. Hana alabela kwakatulo Kawana naize bakuteka katulo, kono baka nyatisisa nikobona kuli bazwelapili cwañi. “Naha izamaiswa kimulao ni tukuluho teñi liswanelo zabatu lilikanelezi. Fokuñwi wakona kuhonona, kulumelelana kapa kuamuhela hanyinyani katulo. Luka nyatisisa nikubona kuli muhato sakata wakunga kiufi,” nekubulezi Kawana.
Mwakatulo yeswana Schimming-Chase naize mulao wabu274 waofesi yebona zalitolongo mwanaha Namibia, obulela kuli patinti uswanela kuba mwakozi yakushwa pili mubeleki wamakete akona kueleza kuli alukululwe, kakuba ofitelela maata afilwe kulikwambuyu wabuiketo ni silelezo. “Kamaikuto aka kakutoloka mulao obulelwa, bañoli nebasatalusi kuba famunyako walibita kuba libaka lakukona kulukulula mutu hakubulelwa mulao wabu 274. Kabe neli ona mulelo wamulao, neku kabulelwa cwalo mwakalulo 109,” nekubulezi Schimming-Chase.
Zeo halili cwalo kopano yaPDM ne amuhezi katulo. “Haiba kufumaneha kuli butuku bwahae habumulumeleli kuina mwatolongo, kitaba yende kuzwelela kwakhuta. Ukaba alukuluzwi kuli afumane pabalelo yabalubasi ni liñaka zasipatela,” nekubulezi muñoli yomuhulu waPDM Manuel Ngarigombe. Mwilima nafumanwi mulatu wabukwenuheli kakuba nikabelo mwakubata kupuma sikiliti sa Zambezi kwanaha Namibia mwahala Muimunene 1998 ni Ñulule 2003. Sapili nabata kufumana taelo yakhuta kuli alukululwe kono nekupalile ñohola. Nabulezi kanako yeo kuli ukula butuku bwalipiyo mi una nikuya kwalikalafo habeli kaviki.