MUITUTI ya zibahala ka Petrus Haitula na kilwe a lengwa mwatolongo kuyakuile mwanaha Zimbabwe sunda ye felile la bunee. Muituti ki muyahi-tota wa naha ye, yana kile aya mwanaha yani kuli a yo nanula mapampili a hae a tuto ka kuituta kosi ya buticele.
Haitula na tamilwe mwanaha yani mwakweli ya Muyana silimo sale sa 2005 kasamulaho wa kubulaya muhabo muta kumano zuha kanyi fa kapisi ka nama kene ka besizwe.
Muituti na yemi fa pila Muatuli Mary Bowora mwakhuta ya Mutare ni kuzwekisezwa bufosi bwa pulao, ni kufiwa koto ya ‘kuina’ mwatolongo kuyakuile-bupilo bwa hae kaufeela.
Mwalilimo ze peli ze felile, Haitula na kile a kunupa nyandi Jason Amaambo Kaherero ni kuholofaza Jeremiah Apeopange mwamanoka, kalibaka la kapisi ka nama kene ka besizwe kao.
Mutompehi Joel Amaambo, ndatahe mufu, na kile a amuhela koto yene filwe ku sibangoki ka mazoho a mabeli.
Mwamuzeko wa pili mwakhuta ye swana yona ya Mutare fa pila mubusisi wa khuta, mutompehi Fabian Feshete mwasilimo sale sa 2005, Haitula na kilwe a zekisezwa lifoso za kutula milao ya naha yani, hala yona, kukena mwamuseto wa naha yani ni tobolo.
Haitula na n`olisizwe kwasikolo sa buticele sa Mutare Teachers’ College mi neli membala wa sisole sa naha ye, pili a sika tateka kale ni lituto za hae za buticele zeo. Tobolo ye nyinyani yeo, ye sika n`oliswa mwalibizo la hae I kulubelwa kuli ne uzwizwe ni malumo a yona a lobapeli (8) ni kukena ni yona mwanaha yani isi ka mulao ni kulobaka milao ya fa museto ni mwahala naha yani mwasimpangaliko kamukana.
Mwanako yani ya bufosi, Haitula nana ni lilimo ze mashumi a mabeli kaze peli (22) mi na eza silimo sa hae sa bubeli kwasikolo sani.
Kakuya ka muyahi ya sepahala, ha kusepisi hande nji sibangoki uta fiwa sikuka sa kukenela tolongo ya hae mwanaha mo kakuli ku utwahala kuli u inzi mwaketelelo ya milao ya naha yani.
N`ohola, ba Likolo la Kozo ni Silelezo neba kile ba tumusa kaza mungendenge wa bona oba lela mwabukamuso wa kubona kuli bayahi ba naha ye baba fiwa likoto mwalinaha zen`wi sihulu za sikiliti sa SADC, bano kutisezwangwa kwanu kwahae kuli bato kwalelwangwa mwalitolongo zamo ni kufiwa likelezo sakata za bupilo ka mingendenge yeli mwalitolongo za mo kuli kasamulaho wa kuzwa mwatolongo babe bayahi sakata hape isi libangoki.
Mungendenge-tuna o, kakuya ka Likolo la Kozo, u biza ni kutokwa tuso sakata kuzwelela kwaLikolo la Mulao mwanaha mo.