RUNDU-Ruha rokuhova kuwapukura evango eli lyazonaukire, lyaKavango Museum ngesi runa pu, nye esesupo yimaliva kunakuninkisa yirugana yauvali yipire kugendapo nawa.
Museum ezi kwakara kevango eli avatumbura asi Maria MwengereCultural Centre modoropa zaRundu, kwakere momukaro dona unene monomvhura dapita.
Yiruganeso nayinye eyi vapungura mevango eli kuna kara momukarodona, ano ekuma nye lyomeseum ngesi nalyo lyagwa nare.
Kwalitungire mo 1985, siruwo soukoloni ano siruwo sina kwakere lina paturukire tupu vazera velike,ano vasovagani awo kwavapulisilire tupu kuza kevango lyokupwizumukira.
Evango eli kapi valiruganesa kutunda tupa apa Namibia gagwana emanguruko lyendi mo 1990.
Ano yiruganeso nayinye kwayizonagura uhwa, ano yimwe kwazonauka yene morwa kapi vanakuyiruganesa ndi kapi vana kuyikeverera.
Yimwe yoyitji, yipapa nowayi ngoso kwayitura mevango eli, ngwendi yikuku eyi ngavayengeke evango eli nayo moyili.
Eyi yina kara dogoro papa ngesi asi yina wapa ntudi yipirangi yelike yina kara momukaro gomuwa. Yirugana yokuwapukurura kuna karamo kuwapukurura ekuma, pevhu ntani kupayinda ekuma nalinye.
Vantu vatunga momukunda vahara unene kupungura yompo ndi yomutaro kuna kugava makuye koministeli zovadinkantu, sirugana sanavenye,maudano nompo, asi kapi vana kufira sinka evango eli ntani ngano vaturako muntu ana kutarera evango eli.
Helvi Mbwalala, ogu kavapere sinkwa ntani sirugana sokutarere evango eli, mokwedi kwaSiwogedi 2012, kayinkondopekere asi kwaNAMPA asi Kavango Meseum ngesi kuna kuziwapukurura ano ewapukururo kwatameka mwaKudumogona mvhura zina puko vayamene mwaPembankuru.
Age katente asi sikando sauvali zokuwapukurura evango eli, mokuwapukura monda nokuturako noramba ngesi tanko vanalihagekesa nakauke morwa kupira yimaliva.
Nye kuna kumoneka asi kuvhura vatwikire nosirugana esi metwaromo yimaliva yomvhura ezi. Yimaliva yokusika koN$ 500 000 kwayingungunikira mokuwapayika evango eli.
Kampani vana kutumbura asi Litu kwagwana sirugana esi sokuwayika evango eli.
Ano apa nye naliwaperera evango eli murugani gwapo tatameke nye kupongayika nayinye yawapera kukara mevango eli momukunda Kavango.
Age kunakuyimona asi ngadingura nomuhoko edi ntano dakara momukunda gwina nokuvapurako vagave eyi ngavaruganesa nare neyi yantani yipo evango eli likare lina yengwa.