Mulisa Simiyasa
Otjiwarongo- Mukurona godoropa zaOtjiwarongo Leonard Simushi kahundilire vakansela vakwawo asi vahepa kumoneka kovantu vatu horowora nokuliwapayikira asi tufaturure matokoro zagusa ndango kukwateramo vatungimo.
Simushi kageve ehundiro lyangesi mosigongi sokuhova sondango momvhura ezi kasikereko moOtjiwarongo mevango eli ava karere yigongi yawo ngondango, moune unapuko. Age katente asi vatungimo moOtjiwarongo kuna hara kumona nompitisili dawo vana kurugana kwahana umbondo, kuna kara nosinka ntani egendeso lyewa lyokuyukilira pamberewa. ‘’ Ndango nye mokusikisamo yihepwa eyi, kuninkisa nkarapamwe ziyihafere, nye pwahepa kukara magwanekero gomawa gana kuza komeho ntani omu nye tuna kukagava yitundwamo nayo vanayihepa unene. Simushi katente asi kurugana kwahana umbondo nayikara situmbukira segendeson ndango ezi monomvhura ntano odo dina kara komeho, omu yina kara asi sinzi somaudigu navagatarurura tupu. ‘’ Apa nye tuna kutameka mvhura ezi, ame kuna kuhundira vakansela vakwetu asi vahepa kurugana unene ose hena turuganene kumwe. Malisigo getu paupolitika narumwesi naga kara asi tupire kusikisamo yirugana yetu, ndi kurugana eyi vana hara vatungimo.
’’ Yimo ana kutanta. Simushi katente asi ndango kuna kara nosigongi sokutameka elima nokutanta asi vakansela valituremo, ano vatungimo vakare nehuguvaro kovakansela vawo. Age katente asi vakansela vanare vaturapo ntateko omu pana kara matungo, gomambo, kugava yirugana, ntani ntateko omu navatwara komeho egano twaromo lyo 2025, eyi yina kugava nzira zongwa kondango. ” Sirugana sondango ngesi kutwikira opo vahagerere ava vatulisapo etateko lyangesi, nokuyitura nye mosirugana momagazaro goyirugana,’’ yimo ana kutanta.
Vakansela wovape wodoropa zaOtjiwarongo kuna kara muna hamene Mukurona godoropa Simushi, munona gwendi kuna kara Sebeteus Guiteb, Namibia Kandume age kuna kara munasipundi gokomitiye zegendeso, omu ana karamu NaGodhardt Hoko ntani Magano Johannes, ntani kumwe na Ernest Afrikaner, ogu ana kara asi gokugwedako kokomitiye. Gerd Sohrada kuna kara tupu silyo sondango. -Nampa