Auleria Wakudumo
Omunandjungu nenyakwa mokufaneka Have Mukwendje okwa ulika ounongo waye womeenyala koNational Art Gallery yaNamibia neudo.
Oilonga yaMukwendje ohai holola ongushu nelitulemo laye mokufaneka. Okudja kokule, oto mono nale omafano aye kutya okwa yooloka komafano ho mono efiku keshe. Omafano aye omashambula nokwelikalekelwa.
Mukwendje iha faneke ashike, ndele oha faneke yoo pamukalo wokupainda efano ndele tali kala la longeleka.
Omufaneki dingi ou odalele yaWambo, a yambukile mOkalalongo yaHaudano mOmbandja moshitukulwa shaMusati.
Luhapu, omafano aye ohaa holola odiililo yaye. Efano laye a fdaneka la kula oleli lOmupresidente Netumbo Nandi-Ndaitwah oshoyo omafano amwe ovalelei va fimana muAfrica ngaashi: Nelson Mandela.
Omafano aMukwendje amwe otaa holola odiililo yaye nondjokonona yokaana okaAfrica molweendonghalamwenyo lako lidjuu okudja konima yefiya fiyo okexumokomesho.
Omafano aye otaa holola yoo ondjokonona yoshilongo shetu. Luhapu oha holola omaliudo aye mokufaneka.
Oilonga yenyakwa eli otai hangika koNational Art Gallery of Namibia.