Elelo lodoolopa yaUtapi  opamwe noRoad Fund  Administration (RFA) nosho yo ehangano ledina Roads  Authority (RA) ova tula po eudafano opo va wapaleke eepate domOutapi. 

Ovakulunhuwiliki  vomahangano oo, Nashilongo Ananias wOutapi, Ali Ipinge wo-RFA osho yo Conrad Lutombi noshoyo wo-RA, ova ninga omutumba oshivike sha dja ko koWindhoek okukundafana nghene tava ka longela kumwe. 

Omahangano aa otaa kala e na elongelokumwe lokutunga eepate, okutula po omadidiliko omeepate, okuwapaleka omapandaanda nosho yo okutunga omalambo  okulotoka omeva nosho tuu. 

Oilonga ei otai ka tamekwa momwedi tau ya. Omunambelewawiliki wo-RFA Ali Ipinge okwa ti ehangano lavo ole lilongekida okukala la longela kumwe nodoolopa yaUtapi okueta po eputuko. 

“RFA ota ka yambidida odoolopa yaOutapi neeporogalama odo twa kundafana fiyo omudo tau uya,” ta ti. 

Ipinge okwa ti RFA ota ka longifa oshimaliwa shomutengenekwafaneko womudo 2025 fiyo omudo 2026. 

Okwa ti R FA ota  kwashipaleke okuyambula po eepate moshilongo molwaashi eepate oda fimana. 

Mayola wodoolopa Outapi  Selma Asino okwa ti odoolopa yavo oya taalela omashongo eepate dii okudja modoolopa fiyo okOtsandi. “ Eepate oda ninga omalambo. 

Pefimbo lodula eepate ohadi talama omeva momalambo,” ta ti. Okwa weda po ta ti ovashingi veetuwa ohava kala  ve li moupyakadi ngeenge eepate da talama omeva ile ngeenge tava shingi mopate ina omalambo. Asino okwa yelifa ta ti  nonande muni wavo ha mono oshimaliwa okudilila mo mayakulo a futwa koshiwana, inashi wana okutunga eepate. 

Okwa ti Outapi odoolopa ya kula moshitukulwa shaMusati noi na omuvalu wovanhu vahapu, oiputudilo ya yooloka neembelewa depangelo. 

“Muni wOutapi okwa yandja eenhele dedu koiputudilo ya yooloka opo  ovalihongi va mone omhito ve ke lihonge,” Asino ta ti. 

Mayola okwa pandula omahangano aa avali eshi ta ka yambidida odoolopa yavo nokukaleka po oukumwe. 

-fhamalwa@nepc.com