Presidente gontotera gwaNamibia Sam Nujoma, kavamukangangere asi age gosihonena moumpitisli ogu gakondja una mwene wovantu vendi, ntani yirugana yomutaro omu ana kara asi age gumwe govaguhya ava vakondjara Africa nokuhuyunga asi age muAfrica mwene mwene. 

Edi nonkango kahuyungire Presidente gwaAngola ntani munasipundi gombunga za African Union, Joao Lorenco, ogu kakere nage asi gumwe govakalipo pediworoko lyaNujoma kalikereko posira somaudano atutumbura asi Independence stadium moVenduka moutano omu kavageve mfumwa komeho vakamuhoreke momapeu. 

Age katjangwilire Nujoma asi mpitisili gamanapo nayinye yaAfrica ana kara nomasanseko gana kwata moyitji, ependa lyavaNamibia ogu ana kara hena asi kapi tovhuru kumutjangurura, age mukondjeli gwaAfrica zombindakano. 

Lourenco simpe kakageve mfumwa komapenda gamwe gaNamibia aga gatusiga nare kumwe novaAngola vakwawo omu valipakerere varwise vanyengi vakeremo wokutundilira kosirongo saSouth Africa woukoloni eyi yatwaredera dogoro Namibia agwane emanguruko. ‘’ Momukaro nye ogu tuna kara gokulira, simpe kuna kara hena siruwo sokutara kweyi twarugana. 

Ose kuna kuyimona eyi mulyo unene, nompora ezi tuna gwana ngesi zanarunye, kapi hambara yikare yireru nampili moAngola ngano kapi twavafundire owo woukoloni, eyi yayaninkisa dogoro Namibia nage agwane emanguruko lyamwene,’’ yimo ana kutanta mpitisili gwaAngola. 

Mombudi zendi nye zina kayukisire kekoro lyaNujoma ntani vaNamibia navenye, Lourenco katente asi yirugana garugana ogu Presidente gontoterwa vahepa kuzitjanga narunye narunye momasanseko nagenye omu ana kara asi age gomutaro omu vatekuru vetu ngava kagusako sihonena ngovaNamibia ntani vaAfrica navenye mokontinente nazinye. -Nampa