Venduka – Mukadona gonomvhura 28 kavamukwaterere kononkondo siruwo oso age munendi gomugara gomusesugona kuna kutara, siruwo oso mugazarerwa ogu gahwililire monzugo zawo zokurara monongura sikondovike sina puko momukunda gwaGibeon. Ehudi eli kalihorokerere pokaruhagona vana kutumbura asi Helena Pieters moGibeon. Mokukwama vaporosi vaNamibia, muuyungi gwawo komisaragona Edwin Kanguatjivi mukadona ogu gonomvhura 28, kakere ana ponyonyoka kumwe namunwendi apa kagumupidwire muvero gwendi mokuzogerera apa gagusininikire mokuguzegurura muntu ogu gadiva ntani kakere asi ana mudimburura. Kanguatjivi katente asi apa nye mugazarerwa kahwililire monzugo, age makura talipaterere nage kumwe monda kumwe nokutantera munyandi asi aguseko yikoverero yendi nye age yiyo kanyokere.
Mugazarerwa makura yipo nye katoonene mukadona ogo mezimo, kumwe nokumutoona monompatji nokumutantera asi gahepa kurara. Makura age yipo nye kamuhutwire kumwe nokumurara gahana kuhara. Opo nye ana kutakuma asi ngano agwane mbatero, munwendi gomumati yipo kapindukire kumwe nye nokutara ozina omu vana kuvakwatera kononkondo.
Vaporosi kavatente asi mugazarerwa yige Abraham Swaartbooi, ogu gadivikwa asi yige Turuteb. Mosihorokwa simwe munona kadona gonomvhura 11 kamukwaterere kononkondo mumatigona gonomvhura 17, vamusinda vawo modoropa zaKaribib, morukanda vana kutumbura asi Harambee. Sihorokwa kasihorokere monovili pokatji ko 09h00 no 15h00 momapeu. Kanguatjivi katente asi mukadona ogo kavamusigire gelike membo ozina ava kavazire vakakara pehoreko.
Kanguatjivi katente asi mukadona yige kazire akadingure mumati pembo lyawo, makura mumati yipo kahundilire mukadona asi gahepa kumupa utovara age yipo katente asi kwato. Kuna kuyigazara asi mugazarerwa kalihutwire mwene makura kumwe nokuhutura hena mukadona yipo nye kavatamekere kukara kumwe panyama. Kanguatjivi katente asi mugazarerwa kavamukwete age ngesi kuna kumundindira aka moneke kompanguro kwamangastrata modoropa zaKaribib mouvali.