Omuimbure womizumbi omukuru wa Namibia omutjiukwa tjinene ngwa yata ozondambo ozongoto motjitamba ihi aa utire motjitamba tjOviritje, ma suvisiwa muhuka mOkouue ka Vitoto. 

Ondjira eye meimburiro re rimwe ndja imbura nu ku ma i Okozondundu za Kambekura wina nḓa imbura meimburiro re rarwe mu rarwe wina ma imbura kutja ‘Ka ku nondunda kai kayora.’ Ambrossius Ambrose Mutuarari Kaakunga wa ṱire tjiyari 28 ku Katjose mOtjomuise kombunda youvere. Erero petuwo romerinaneno rosikore indji Ost. Barnabasa ovatone vomizumbi va tokererwe amave mu zemburuka okuwongera otjikutu tje okamariva kokurivatera nako ouzeu imbui. 

Muuo mwari otjimbunba ihi Osigera Carlos Hizembi Kambaeukua me tona otjiketara tjombao. 

Wina mu varwe ovengi mwari umwe wovaimbure vakatjoruhonga va Namibia motjitamba hi tjominyaambaze Erna Chimu; Rakutuka Kandjoze na William Peterson. 

Mutuarari wa uta otjomuimbure wOviritje narire omuimbure omukamburire motjimbumba tjomuiimbure omutjiukwa wa Namibia, Jackson Muṋingandu Kaujeua, wina ngwari omuture wa Vitoto, motjimbumba tje tji Omukoroba. 

Kourike we wa pitisire omizumbi pekepeke vyoviritje tjimuna Omapanga, eye ma imbura okunene okuhepa kovandu ovengi pekepeke mbari nohambwarakaṋa komuzumbi we kutja u pite momborongarisiro yoharive ombura yozombura.