WINDOKO – Yabizwa mupolofita Jackson Babi niya nyazwa niyena Frzans Naululu Dumeni, ili bane baswanela kubonahala mwa khuta ya muatuli mwa Windoko viki yefelile, kuli bayo ikupela kulibelela muzeko wabona kwande, nebaboni taba yabona iswa la 24 Sikulu kulumelela lipatisiso za sipokola kuzwelapili. Bababeli nebatamilwe kabaka la kufumanwa ni manaka amabeli asembele, ni tobolo ni malumo kusina liñolo. Hana yemela muuso muzekisi wa sicaba Rowan van Wyk naize taba neli famukoloko kuli bato ikupela kuzekela kwande, kono bayemeli babona neba cincize muhupulo.
Van Wyk yana kupile kuli taba iswe la 24 Sikulu, natolokile kuli nebalumezi manaka asembele kwatatubo, mi balibelezi linepo hala tobolo yene sebelisizwe kakuli nombolo yateñi netakuzwi. Van Wyk naekelize kuli basalibelezi bupaki kwabatu babane, ni siswaniso sesina nikutahiswa. Muyemeli wa Babi Kadhila Amoomo, naize habasika tokomoloha kupo yakuli bazekele taba yabona kwande kono isizwe feela kwapili. Amoomo naize batokwa koliso kuli milatu ki ifi kacwalo bafa bazekisi bamuuso nako yetelele yakulukisa muzeko wabona. Carlos Kamwi ili yayemela Dumeni naize kabaka lakuli lipatisiso lizwelapili bakafa muuso nako yelukela.
“Taba neli famukoloko kuli lukupe kuli beluyemela bazekele kwande, kono haluna kuzwelapili ni kupo yaluna, kacwalo lufa muuso nako yeñata yakubatisisa. Lusa buluka liswanelo zaluna zakukupa kuli beluyemela bazekele kwande mi lukatisa kupo zazi leliñwi,” nekubulezi Kamwi. Baana bababeli babanyazwa basiala mwasitokisi. Babi nabonahalile anosi mwakhuta yeswana hala mulatu oswana wakuzuma zanaheñi one ukwaluzwi mwakhuta ya Gobabis. Van Wyk nakupile muatuli yomunyinyani Linus Samunzala kuli ashimbululele taba kwakhuta ya Gobabis, iliteñi Babi aka yobonahala sina kamukwa kachenu. Kasamulaho akubonahala mwakhuta Babi nakutiselizwe mwasitokisi. Balateleli bahae ili bane baile kwakhuta nebahuwile, “Lwakulata Papa.”