OSHAKATI – Elelodoolopa laShakati ola dula okuongela omwaalu woshimaliwa sha koya poN$800 000, mouvalelo wonhomenawina.
Ouvelelo ou owa li wa nuninwa eongelo loshimaliwa shomauliko oipindi oTotem Expo, osho sha teelelika shi ka kale ko momwedi tau ya.
Mayola wodoolopa yaShakati Leonard Hango okwa ti okwa shambulwa koukumwe, ohole osho yo elongelokumwe olo li li pokati kovakalimo vomeni loodolopa, kondje osho yo vokeedoolopa dopopepi nokokule.
“Eyambidido leni moshitufi shouvalelo wonena otali ke tu kwafa tu ka kale tu na oshivilo sha tata sha indula, shomikwi de likita,” ta ti. Moshipopiwa shaminista womayambulepo eedolopa nomikunda James Sankwasa, osho sha leshwa komupeduminista waye Evelyn !Nawases-Taeyele, okwa yelifa kutya Oshakati oyo odoolopa imwe ya shiivika nawa mokukaleka po omufyuulukalo, okukaleka ovanhu kumwe osho yo okueta oukumwe pokati komapata.“Okudja ashike eedula da ka pita, fiyo opaife odoolopa oi li ashike tai longo shomupondo,” Sankwasa ta ti.
Okwa twikila kutya Oshakati otai longo oilonga yomupondo, oyo i li tai nane ovanhu okudja komakule nomakule moikondo ihapu, ndele hamwaashi ashike sho otem.
OTotem Expo oya teelika i ka tameke mo 29 Mei fiyo omu a 6 Juni 2026.
Omupopiliko woodolopa Martin Kapuka okwa ti neudo otwa teelela natango oinima ihapu ngaashi omafiyafano oukadona dingi, Miss Totem osho yo Miss Womalenga.
“Ngaashi muMiss Womalenga ohandi pula ovakulukadi okudja peedula 35, wa finda pombada ve lishangife, vo vadule oku kufa ombinga navo, shaashi ohava mono va fyaala po koinima ihapu,” ta ti.
Kapuka ota indile ovakwashiwana ve uye va kufe ombinga, vo va dule okusapota odoolopa momikalo keshe tava dulu i dule oku ya komesho, vo natango tava yambidida yo ovanangeshefa vomangeshefelo opedu.
Odoolopa natango oya telelela yo oshitufi shakula sho Mayor’s Cup, osho tashi ka yandja yo omhito kovadanitanga va holole oipewa yavo.