KATIMA MULILO – Ñaka wa sizo yana tumile hahulu mwa sikiliti sa Zambezi Alexander Mutonga Mushaukwa utimezi. Mushaukwa na timezi Labulalu mwa sipatela sa sikiliti kasamulaho akukula nako yetelele. Na na ni lilimo zemashumi alobapeli ka silisiñwi. Munyana ‘hae Pumulo Mushaukwa na nitifalize lifu la muhulwana ‘hae. 

Mutonga yana belekile hape kakuba ticele na zibahala hahulu kalibizo la hae la buñaka la Kachiyochiyo, mi nesi feela mualafi kono hape neli muopeli walipina za sizo, mi lipina zahae lisa bapalwa fa wayalesi ya sikiliti ya Ñwanyi ni kacenu. 

Mwa manzwi ahae Pumulo naize muhulwana ‘hae natusize batu babañata mi lifu la hae halisika siya feela lisuba leli tuna mwa lubasi lwa ba Mushaukwa, kono uka tondiwa kibatu kaufela bane atusize. Litukiso za kepelo ya hae lizwelapili mi Pumulo naize uka yo bulukwa kwa munzi wa hae kwa Lusese ona viki ye.