Omulumenhu weedula 26 omukwashiwana waAngola ou a hombola okaana keedula 14 okwa anyenwa omhito yokulifutila mo modolongo eshi a holoka momhangu yamengestalata waRundu Etivali. 

Oshibofa shaye osha undulilwa komafiku 9 Desemba 2025 nelalakano lokuningwa omakonakono omoule. 

Ina yokaana weedula 41 ou naye kwa li a kwatwa po shaashi a pitika okaana kaye ka hombolwe okwe lifutila mo modolongo noshimaliwa N$1 000. 

Oshiningwanima osha ningwa mexuliloshivike komukunda Ncaute koshitukulwa shaKavango West. 

Omupopiliko wopolifi koshitukulwa shaKavango West Chief Inspector Raimbert Muronga okwa koleka oshiningwanima eshi shomunafikola e li mondodo onhinhano kwa li a hombolwa pamukalo wopamufyuululwakalo. 

Opolifi oya hokolola tai ti omufekelwa okwa pula ina yokakadona kutya okwa hala oku ka hombola ndele ta dimine. 

Otaku hokololwa kutya okudja opo okaana oka ka dja keumbo lomufekelwa ashike oka kala taka i natango kofikola. 

Omufekelwa okwa udanekela ina yookana kutya ote ka futile ofikola osho yo oku yambidida meemhumbwe dako adishe. 

Omufekelwa oku li omunailonga ha tonatele eengobe. 

Opolifi oya kumaida ovadali opo va xulife po okupitika ounona vavo va hombolwe ve na eedula inadi fika molwaashi osha nyika oshiponga. 

-fhamalwa@nepc.com.na