KATIMA MULILO – Sisole sa naha Namibia ni Sisole anaha Botswana neba nyatezi tumellelano yakubeleka hamoho Labulalu. Mulelo tuna kikutusa ni kumbweshafaza mupilelo wabatu baba yahile kwa mukulela wamuseto. Nihaike linaha zepeli lina ni silikani sesi tuna, sicaba baba pila kwa mukulela wa miseto, sihulu mwasikiliti sa Zambezi ni sikiliti sa Chobe mwanaha Botswana, bazwelapili kutalimana ni butata kuamani kusila museto hamoho cwale ni kusebelisa nuka kufumana kwa limbule za mwa mezi.
Kakulemuha butata bobuliteni ni takazo yakubata kubupa silikani sesi tiile nikusebeza hamoh, mukopano omutuna one ezahezi mwa Gaboron, mwanaha Botswana kukala la 5 kuisa la 9 Muimunene 2022, nolaezi lisole zalinaha zepeli kutahisa mulelo kamo baka belekela hamoho sihulu hala likezo zetalima baba yahile kwa mukulela wa museto.
Zeo litaha kasamulaho bayahi banaha Namibia babapila kwa museto neba bilaezi kuamana ni mulao one bali kiwakukunupa ni kubulaya. Mwasilimo sa 2020, mizwale babalalu, Tommy (48), Martin (40), ni Wamunyima Nchindo (36), ni muhabo Sinvula Munyeme neba kunupilwe ki masole banaha Botswana la 5 Njimwana kwamukulela wanuka ya Chobe.
Khuta ya Kasane nekile ya liulula masole banaha Botswana kuli neba sika eza kabomu kaku bulaya kasituhu mizwale babalalu balusika lwa Nchindo ni muhabo bona yana simuluha mwanaha Zambia. Bayahi basikiliti sa Zambezi neba kile bacaula, bakupa naha Botswana kufelisa mulao wakukunupa ni kubulaya. Sikwata sesi bilaela nesikile sakupa khuta ya bubangoki ya lifasi kubatisisa mueteleli wanaha Botswana Mokgweetsi Masisi ni mulauli wahae wasisole Placid Segokgo hala “kubulaya kasituhu” baana babane.
Kono khuta neize haikoni kubatisisa kakuli likakalezo likwanda kamaiso yabona. Hane banyatela mulelo Labulalu, muzamaisi yomuhulu wasisole sanaha Namibia Petrus Nathinge naize mulelo kikuzibisa sicaba milelo yatumelelano ya sisole kwamukulela wamuseto. “Likezo zeo lika petwa kakueza mikopano yakubabaza yekana izamaiswa kilisole za linaha zepeli, hamoho cwale nibale belu beleka ni bona,” nabulezi.
Bababeleka nibona bangelezi cwalo ni likhuta za sizo, makolo abona za mabasi, miseto, silelezo ni buiketo, silalanda, njimo, bundui, makete, katulo, man’usa, tutengo twa muuso twa silelezo, tutengo twa likoleko, babihi ba makande ni baeteleli ba likeleke. Baetapili balisole zepeli neba itamile kusebeza katata kubona kuli linaha za silelezwa ni sicaba sa bukelezwa.